पोखरा ।
पोखरा महानगरपालिका वडा नम्बर ५ ले गत आर्थिक वर्षमा करिब ८० प्रतिशत बजेट खर्च गरेको छ । वडा कार्यालयले गत आर्थिक वर्षमा ७९.४९ प्रतिशत बजेट खर्च गरेको हो ।

आर्थिक वर्ष २०८०/८१ मा विनियोजन भएको २ करोड ३४ लाख ७७ हजार बजेटमध्ये ७९.४९ प्रतिशत बजेट खर्च भएको वडाध्यक्ष विष्णुप्रसाद बरालले जानकारी दिए । उनका अनुसार महानगरबाट आउनुपर्ने बजेट निकासा बाँकी हुँदा बजेट खर्च ८० प्रतिशतभन्दा बढी हुन नसकेको हो । वडा नम्बर ५ ले गरेको सार्वजनिक सुनुवाइ कार्यक्रममा बरालले महानगरबाट बजेट निकासा बाँकी हुँदा बजेट खर्च कम भएको तर्क गरे ।

उनले महानगरबाट १ करोड ९० लाख रुपैयाँमात्र निकासा भएको उल्लेख गरे । महानगरकै कारण सम्पन्न भएका योजनाको भुक्तानीसमेत रोकिएको उनको दाबी छ । ‘काम शतप्रतिशत भएको छ । तर, महानगरबाट आउनुपर्ने बजेट नआएको हुँदा काम सकिएको भए पनि भुक्तानी बाँकी भएको कारणले ७९ प्रतिशतमात्रै बजेट खर्च देखिएको हो,’ उनले भने ।

गत आर्थिक वर्षमा वडाबाट २३ योजनामध्ये १८ वटा सम्पन्न भएको, २ योजना कार्यान्वयन हुन नसकेको र ३ वटा योजना कार्यसम्पन्न भएपनि भुक्तानी हुन नसकेको वडाध्यक्ष बरालले बताए ।

वडा कार्यालयले गत आर्थिक वर्षमा २ करोड ५३ लाख १८ हजार ७२४ राजस्व संकलन गर्न सफल भएको छ । नगदीतर्फ १ करोड २९ लाख ३२ हजार २ सय ५४ र मालपोत तथा सम्पत्ति करबाट १ करोड २३ लाख ८७ हजार ४ सय ७० रुपैयाँ संकलन भएको वडासचिव लक्ष्मण शर्माले जानकारी दिए ।

सार्वजनिक सुनवाइ कार्यक्रममा लेखराज पोखरेलले वडा कार्यालयले गरेको काम सकारात्मक रहेको बताए । उनले सार्वजनिक स्थलमा हुने मद्यपान तथा धूमपान प्रयोगलाई रोक्न कसैले चासो नदिएको आरोप लगाए । स्थानीय शुभद्रा कोइरालाले मठ, मन्दिर पानी ट्यांकीलाई वडा कार्यालयका कुनै पनि सहयोग नभएको गुनासो गरिन् ।

वडाध्यक्ष विष्णुप्रसाद बरालले आफूले निर्वाचनको बेलामा गरेको प्रतिवद्धता पत्र अहिले पनि डायरीमा बोकेर हिँड्ने गरेको बताए । सार्वजनिक सुनुवाइबाट जनताका आवश्यकता अझै धेरै रहेको थाहा भएको उल्लेख गर्दै उनले ती आवश्यकता पूरा गर्न बाँकी कार्यकालमा पहल गर्ने आश्वासन दिए ।