पोखरा ।
गण्डकी सरकारमा सहभागी हुने एमाले सांसदहरुकाे नाम सार्वजनिक भए पनि सपथ कति वेला हुने अझै अन्यौल छ । एमालेका सांसदहरुलाई १ बजे पर्यटन बोर्डको कार्यालयमा सपथ ग्रहण समारोहमा सहभागी हुन भन्दै निमन्त्रणा पठाइएको भए पनि प्रदेश प्रमुखकोमा मन्त्री नियुक्त गरिएकाे पत्र अहिलेसम्म पुगेकै छैन् ।

मन्त्रीहरुलाई प्रदेश प्रमुखले सथप ग्रहण गराउने संवैधानिक व्यवस्था छ । प्रदेश प्रमुख कार्यालय श्रोतका अनुसार यो समाचार तयार पार्दासम्म औपचारिक रुपमा मन्त्री नियुक्त भएकाे पत्र प्रदेश प्रमुखको कार्यालयमा पुगेको छैन् ।

पत्र पाएपछि पनि सपथ ग्रहणको तयारीका लागि कम्तिमा ३ घण्टाको समय आवश्यक पर्छ । त्यसैले एमाले सांसदहरुलाई निम्ता गए अनुसार १ बजे नै सपथ ग्रहण हुने सम्भावना न्यून छ ।

एमालेका तर्फबाट गण्डकी प्रदेश सरकारमा ४ जना मन्त्री बन्दै छन् । मन्त्री बन्नेहरुको नामावली संसदीय दलका नेता खगराज अधिकारीले मुख्यमन्त्री सुरेन्द्रराज पाण्डेलाई बुझाइसकेका छन् ।

एमालेबाट कास्कीका प्रकाश केसी, बाग्लुङका कृष्ण पाठक, पर्वतका मित्रलाल बस्याल र नवलपुरकी पद्मा जिसी मन्त्री बन्दै छन् ।