जोमसोम ।
मुस्ताङको आधा शताब्दी पुरानो गौरवमय बहुप्रतिष्ठित ५१ औं संस्करणको थाक खेलकुद तथा च्याम्पियनसीप प्रतियोगिता आगामी असोज ५ गतेदखि ८ गतेसम्म मुस्ताङको मार्फामा सञ्चालन हुने भएको छ । थाक खेलकुद तथा सांस्कृतिक विकास संघको शनिबार बसेको बैठकले यस्तो निर्णय गरेको हो ।

हिमाली जिल्ला मुस्ताङको आधा शताब्दी पुरानो इतिहास बोकेको थाक खेलकुद तथा च्याम्पियनसीप प्रतियोगिता प्रतिष्ठित खेलकुद प्रतियोगिता हो । संघका अध्यक्ष कृष्णकुमार शेरचनको अध्यक्षतामा बसेको थाक खेलकुद प्रतियोगिताको पूर्वतयारी बैठकले ५१ औ संस्करणको थाक खेलकुद तथा च्याम्पिनसीप प्रतियोगिता मार्फामा गर्ने निर्णय गरेको हो ।

कोभिड महामारीका कारण लगातार स्थगित रहेको ५० औं संस्करणको थाक खेलकुद प्रतियोगिता २०७९ असोजमा मुस्ताङको थासाङ ५ ताक्लुङमा गरेको थियो । त्यस समय संघले आफ्नो ५० औं वर्ष पूरा गरेको उपलक्ष्यमा स्वर्ण जयन्ती भव्यताका साथ मनाएको थियो ।

संघको नेतृत्व परिवर्तनपछि विविध कारणले २०८० सालमा थाक खेलकुद तथा च्याम्पियनसीप हुन सकेन । यस पटक भने संघले विभिन्न अवरोध र चुनौतीलाई पन्छ्याएर गौरवशाली ५१ औं संस्करणको थाक खेलकुदलाई निरन्तरता दिने निर्णय गरेको हो । ५१ औं संस्करणको थाक खेलकुद तथा च्याम्पियनसीप प्रतियोगिता २०८१ का लागि साबिक खेलकुद तथा सांस्कृतिक विधालाई परिमार्जनसहित प्रतियोगिता सञ्चालन गर्ने तयारी गरेको संघका सचिव विष्णु थकालीले जानकारी दिए ।

थाक खेलकुद तथा च्याम्पियनसीपमा पहिलो पटक ४० वर्ष उमेर कटेका खेलाडीलाई सहभागी गराउने गरी परम्परागत सादा धनुष तारा खेल प्रतियोगिता समावेश गरिएको संघका सचिव थकालीले उल्लेख गरे । यसअघिको संस्करणमा आयोजना हुँदै आएको मिस मुस्ताङ प्रतियोगिता र गायन प्रतियोगिता थाक च्याम्पियनसीपबाट हटाइएको संघका सचिव थकालीको भनाइ छ ।

थाक खेलकुद तथा च्याम्पियनसीपमा पुरुष भलिबल च्याम्पियनले नगद १ लाख ५० हजार र उपविजेताले नगद १ लाख पाउने

संघले यस वर्षदेखि थाक खेलकुद तथा च्याम्पियनसीप प्रतियोगिता अन्तर्गत पुरुष भलिबल प्रतियोगिताको पुरस्कार राशि वृद्धि गरेको छ । पुरुष भलिबलको च्याम्पियनले नगद १ लाख ५० हजारसहित सिल्ड, मेडल, ट्रफी र प्रमाणपत्र पाउनेछ । उपविजेताले नगद १ लाख पुरस्कारसहित शिल्ड, मेडल, ट्रफी र प्रमाणपत्र प्रदान गरिने जनाइएको छ ।

प्रतियोगिताको सर्वोत्कृष्ट खेलाडी, सर्वोउत्कृट लिफ्टर र सर्वोत्कृष्ट लिब्रोलाई जनही नगद ३ हजारका दरले मेडल र प्रमाणपत्र प्रदान गरिने जनाइएको छ । महिला भलिबललाइ जो कोही पनि टिम बनाएर खेल्न पाउने गरी खुला महिला भलिबल प्रतियोगिता आयोजना गर्ने तयारी संघले गरेको हो ।

खुला महिला भलिबलको च्याम्पियनले नगद १ लाख र उपविजेताले नगद ७५ हजार पुरस्कारसहित शिल्ड,मेडल,ट्रफी र प्रमाणपत्र प्रदान गरिने छ । ४० वर्ष कटेका तारा प्रतियोगिताको च्याम्पियनले नगद ५० हजार र उपविजेता टिमले नगद ३५ हजार पुरस्कारसहित सिल्ड, मेडल, ट्रफी र प्रमाणपत्र प्रदान गर्ने तयारी गरिएको हो ।

खुला आधुनिक आर्चरी प्रतियोगितातर्फको च्याम्पियनले नगद ५० हजार र उपविजेता टिमले नगद ३५ हजारसहित सिल्ड, मेडल, ट्रफी र प्रमाणपत्र पाउनेछन् । थाक च्याम्पियनसीप अन्तर्गत आयोजना हुने नृत्य प्रतियोगिताको प्रथमले नगद ३५ हजार र दोस्रो हुनेले नगद २५ हजारसहित सिल्ड, मेडल र प्रमाणपत्र पाउनेछ ।

थाक खेलकुद तथा सांस्कृतिक विकास संघको मुख्य आयोजना तथा मिलिजुली युवा क्लब मार्फाको सहआयोजनामा हुने ५१ औं थाक खेलकुद तथा च्याम्पियनसीप प्रतियोगिता २०८१ मा जोमसोम र स्याङसहित ६ टिमको सहभागिता रहने भएको छ ।

जोमसोम र स्याङले थाक खेलकुद तथा च्याम्पियनसीपमा सहभागी नहुने पक्का भएको छ । जिल्लाको आन्तरिक खेलकुदको विकास तथा संरक्षण एवं स्थानीय धर्म, संस्कृति संरक्षणका लागि संघले च्याम्पियनसीप अन्र्तगत विभिन्न कार्यक्रम गर्ने गरेको छ ।