पोखरा ।
लामाचौर कप खुल्ला भलिबल च्याम्पियनसिपको फाइनलमा एपिएफका दुवै टिम पुगेका छन् । एपिएफ महिला र पुरुष दुवैतर्फ फाइनलमा प्रवेश गर्न सफल भएको हो । फाइनलमा एपिएफले पुरुषतर्फ नेपाल पुलिस र महिलातर्फ टिपटप न्यु डायमन्ड युथ स्पोट्र्स क्लबको सामना गर्ने भएको हो । नव आदर्श सामुदायिक विकास समाजको आयोजनामा पोखरा १९ लामाचौरस्थित ईन्द्रराज्य लक्ष्मी माविको खेल मैदानमा बिहीबार लिग चरणका खेल सकिएका छन् ।

बिहीबार बिहान महिलातर्फ भएको लिग चरणको अन्तिम खेलमा न्यु डायमन्डले एपिएफलाई ३–० को सोझो सेटमा हराउँदै शीर्षस्थानमा रहँदै फाइनल प्रवेश गरेको हो । पहिलो सेट २५–१८ ले आफ्नो पक्षमा पारेको डायमन्डले दोस्रो सेट २५–२३ र तेस्रो सेटसमेत २५–२३ ले हराउँदै शीर्षस्थानमा उक्लिएको हो । डायमन्डले लिग चरणमा गण्डकी र एभरेस्ट भलिबललाई ३–० को सोझो सेटमा हराएको थियो ।

राउन्ड रोविन लिगका आधारमा भएको खेलमा ४ टिम सहभागी थिए । शीर्ष दुई टिम सोझै फाइनल खेल्ने तालिका अनुसार डायमन्ड र एपिएफ यसअघि नै शीर्षस्थानमा रहँदै फाइनल प्रवेश गरिसकेका थिए । लिगको अन्तिम खेलको रुपमा रहेको यी दुई बिचको खेल फाइनल अघिको प्रशिक्षणसरह मानिएको छ । दुबै टिमले फाइनलअघि एक अर्काको रणनीति बुझ्ने अवसर पाएका छन् । एपिएफले आफ्नो बेन्चमा रहेका खेलाडीलाई कोर्टमा उतारेको थियो । उता, डायमन्डले पनि बेन्चका खेलाडीलाई अवसर दिएको थियो । हारपश्चात एपिएफ दोस्रो स्थानमा रह्यो । एपिएफको ३ खेलबाट ६ अंक छ । एपिएफले लिग चरणमा एभरेष्टलाई ३–० को सोझो सेट र गण्डकीलाई ३–१ को सेटमा हराएको थियो ।

बिहीबार भएको प्रतिष्ठाको खेलमा एभरेष्टले गण्डकी प्रदेशलाई ३–० को सोझो सेटमा हरायो । पहिलो सेट प्रतिस्पर्धात्मक रहे पनि नतिजा भने एभरेष्टको पक्षमा २६–२४ रह्यो । दोस्रो सेटमा २५–१३ र तेस्रो सेटमा २५–१९ ले हराउँदै एभरेष्टले जित हासिल गरेको हो । योसँगै एभरेष्टले ३ खेलमा २ जित १ हारसहित ३ अंक जोड्दा ३ खेलमै हार व्यहारेको गण्डकी अन्तिममा रह्यो ।

उता, पुरुषतर्फ नेपाल पुलिस एक खेलअगावै फाइनल प्रवेश गरे पनि अन्य टिमको टुंगो भने बिहीबारमात्रै लाग्यो । बुधबार निर्धारित समय अनुसार एपिएफ र गण्डकीको खेल खराब प्रकाशका कारण हुन नसकेपछि बिहीबार बिहानमात्रै खेल भएको थियो । उक्त खेलमा एपिएफले गण्डकीलाई ३–० को सोझो सेटमा हराउँदै फाइनलको यात्रा तय गरेको हो । एपिएफले गण्डकीमाथि २५–१८, २५–२३ र २५–१६ को हार व्यहोरेको हो । एपिएफको २ खेलबाट ६ अंक छ । उता, पुलिसको पनि ६ अंक नै छ । दुवै टोलीको समान ६ अंक रहे पनि शीर्षको होडमा लिग चरणको अन्तिम खेल खेलेका पुलिस र एपिएफको खेलसमेत प्रकाश अभावका कारण रोकिएको छ । पुलिस र एपिएफले १–१ सेट जिते । पहिलो सेट पुलिसले २५–१८ ले आफ्नो पक्षमा पारेको थियो । दोस्रो सेटमा पुलिस १९–२५ ले पछि प¥यो ।

प्रतिष्ठाको खेलमा गण्डकीले गलकोटलाई ३–२ को सेटमा हरायो । पहिलो सेट २५–२२ ले जितेको गण्डकीले दोस्रो सेट २१–२५ ले गुमायो । तेस्रो सेट २५–१७ जितेपनि पुनः चौथो सेटमा २४–२६ को हार व्यहोर्यो । अन्तिम तथा फाइनल सेटमा १५–१३ को जित निकाल्न सफल भएको हो । योसँगै गण्डकीको ३ खेलबाट २ अंक रहँदा गलकोटको १ अंक रह्यो ।