पोखरा ।
७७ वर्षकी महिलाले सिर्जना गरेको ‘जिन्दगीका पानाहरु’ पुस्तक शनिबार सार्वजनिक भएको छ । पोखरा ३२ सातमुहाने देउराली निवासी बिमला अधिकारीको सो कृति गण्डकी प्रज्ञा प्रतिष्ठानका कुलपति सूर्य खड्का बिखर्चीले सार्वजनिक गरे ।

उनले पुस्तक आमाहरुको जीवनका भोगाइ र अनुभवको संगालो भएको औंल्याए । सो कृतिले पछिल्लो पिंढीलाई विगत बुझ्न सहयोग गर्ने बिखर्चीको भनाइ छ । कुलपति खड्काले तीज पर्वलाई सिर्जनासँग जोड्ने भएकाले यो कृति विशेष भएको भन्दै सर्जक अधिकारीलाई बधाई दिए ।

२००५ मा जन्मिएकी अधिकारीले ग्रामीण महिला शिक्षाको पहुँचभन्दा बाहिर भएको समयमा पनि ९ कक्षासम्म पढेकी थिइन् । पढ्ने रहर हुँदाहुँदै पनि थप शिक्षा आर्जन गर्न नसकेको र अहिले सिर्जनात्मक रहर पूरा भएको उनले जनाइन् । कृतिमा महिला अधिकार, वातावरण, समाज, नीति र विधिका साथै आफ्ना भोगाइहरु समेटिएको उनले सुनाइन् ।

कार्यक्रममा गण्डकी विश्वविद्यालयका उपकुलपति प्राडा नवराज देवकोटाले यो कृति सबैका लागि प्रेरणादायी बताए ।