पोखरा ।
गण्डकी प्रदेश सरकारका सामाजिक विकास, युवा तथा खेलकुुद मन्त्री विन्दुकुमार थापाले सय दिनको उपलब्धि सार्वजनिक गरेका छन् । उनी ०८१ जेठ १६ गते सामाजिक विकास तथा स्वास्थ्य मन्त्रालयको जिम्मेवारी नियुक्त भएका थिए । तर, मुख्यमन्त्री सुरेन्द्रराज पाण्डेले मन्त्रिपरिषद् विस्तार गर्दै थापाले समाल्दै आएको स्वास्थ्य मन्त्रालय फुटाएर अर्को मन्त्रालय बनाएका छन् ।

मन्त्री थापाले सामाजिक विकासतर्फ र स्वास्थ्यतर्फ गरेका कामको फेहरिस्त आइतबार मन्त्रालयमा पत्रकार सम्मेलनको आयोजना गरेका छन् । उनले सार्वजनिक गरेका अधिकांश काम अनुदान वितरणमा केन्द्रित छ । उपलब्धि विवरणमा मन्त्रालयको निर्देशिका बनाउने, स्वीकृत गर्ने र विभिन्न ठेक्का लगाउने र सम्झौता गर्न उनले तीन महिना खर्चिएको देखिन्छ ।

मन्त्री थापाले शिक्षातर्फ औद्योगिक क्षेत्रमा पेशागत जनशक्ति भएका तह र हालसम्म राष्ट्रिय सीप प्रमाणित नभएका सीप परीक्षणका नयाँ क्षेत्र पहिचान गरेका छन् । जसमा आतिथ्य उद्योग, अटो मोबाइल इन्जिनियरिङ, कृषि निर्माण पेशागत गरिएको छ ।

मन्त्री थापाले मन्त्रालयमार्फत प्राविधिक तथा व्यावसायिक शिक्षा सञ्चालन भएका विद्यालयहरुको प्रयोगशाला एवं उपकरणहरुको उचित व्यवस्थाका लागि १० वटा विद्यालयलाई अनुदान वितरण गरेका छन् ।

मन्त्री थापाले कोरिया अन्तर्राष्ट्रिय नियोग नेपाल कार्यालयका कन्ट्री डाइरेक्टरसहितको प्रतिनिधिमण्डलमार्फत गण्डकी प्राविधिक शिक्षालय निर्माण सम्झौतालाई उपलब्धिमा समेटेका छन् । मन्त्री थापाले यसबिचमा गण्डकी प्राविधिक शिक्षालय निर्माण गर्न १ अर्ब ४० करोड रुपैयाँ अनुदान दिने सम्झैता भएको सुनाए ।

उनले प्राविधिक तथा व्यावसायिक शिक्षा सञ्चालन भएका २५ वटा विद्यालयलाई सिक्दै कमाउँदै कमाउँदै सिक्दै कार्यक्रम सञ्चालनका लागि अनुदान उपलब्ध गराएको जानकारी पनि दिए । फ्राइडे फर फियुचर कार्यक्रममार्फत बालबालिकालाई संस्कार सिकाउने शिक्षाको समेत प्रदेश सरकारले निर्देशिका तयार गरेको उनले बताए ।

फ्राइडे फर फियुचर कार्यक्रममार्फत बालबालिकालाई संस्कार सिकाउने शिक्षाको निर्देशिका तयार

शैक्षिक गुणस्तर अभिवृद्धिका लागि विद्यालयमा कार्यरत शिक्षकहरुलाई पेशागत तालिम उपलब्ध गराइएको उनले उल्लेख गरे । मन्त्री थापाले लोपोन्मुख अवस्थामा रहेका संस्कृतिहरुको संरक्षणका लागि गण्डकी प्रज्ञा प्रतिष्ठानलाई क्रियाशील बनाई महत्वपूर्ण काम गरिरहेको बताए ।

मनकामना क्षेत्रको सञ्चालन, संरक्षण, विकास एवं प्रवद्र्धनका लागि मनकामना क्षेत्र विकास समिति गठन आदेश तयार गरिएको जानकारी उनले गराए । श्रम तथा रोजगार तर्फ वैदेशिक रोजगारीलाई सुरक्षित र व्यवस्थित बनाउन काम भएको उनले सुनाए ।

व्यवसाय गर्न चाहेका व्यक्तिहरुलाई नयाँ सिपमूलक क्षेत्रको पहिचान गरी स्वरोजगार बनाउन कार्यक्रम तय गरिएको बताए ।
‘गण्डकी प्रदेशमा खेलकुदको गतिविधिलाई प्रभावकारी बनाउन महत्वपूर्ण काम भएका छन् । खेलाडी कल्याण कोषको स्थापना र सञ्चालन सम्बन्धी कार्यविधि बनाई अगाडि बढिएको छ,’ उनले भने ।

सामाजिक सेवा, कृषि, नवप्रवर्तन, नेतृत्व विकास लगायतका क्षेत्रमा योगदान गरेका युवालाई क्रियाशील बनाउन काम गरिएको उनले बताए । खेलकुदका विभिन्न संघसंस्थासँग समन्वय गर्दै आवश्यक कार्यक्रमलाई अगाडि बढाउने काम भएको मन्त्री थापाको भनाइ छ ।

द्वन्द्वपीडित बेपत्ता, घाइते, अपांग, सहिद परिवार र विपन्न महिलाहरुको उद्यम, व्यवसाय तथा रोजगारी प्रवद्र्धनमूलक कार्यक्रमलाई प्रभावकारी रुपमा सञ्चालन गरिएको उनले बताए । न्यून आय भएका, श्रम गर्न नसक्ने अशक्त र असहाय, एकल महिला, अपांगता भएका व्यक्ति, बालबालिका, आफ्नो हेरचाह आफैं गर्न नसक्ने नागरिकहरुलाई विशेष प्राथमिकता दिँदै उद्धार, राहत एवं पुनःस्थापना कार्यक्रम मन्त्रालयले सञ्चालन गरेको छ ।

क्यान्सर उपचार सहायता कार्यक्रम अन्तर्गत नेपाल सरकारबाट उपलब्ध हुने सहायता रकमका अलावा गण्डकी प्रदेश सरकारले विरामीलाई एक लाख रुपैयाँ बराबरको उपचार गराउने गरी विभिन्न अस्पतालहरुसँग सम्झौता गरेको बताए । बेनी, पर्वत, लमजुङ, स्याङजा, दमौली, गोरखा, मुस्ताङ र मध्यविन्दु अस्पतालको ओपिडी सेवालाई विस्तार गरिएको जनाए ।

गर्भवती महिलालाई स्वास्थ्य संस्थामा आउँदा वा समुदायमै महिला सामुदायिक स्वयंसेविकामार्फत विद्युतीय प्रणालीमा दर्ता गर्ने गरी पूर्णसंस्थागत सुत्केरी प्रदेश अभियान सञ्चालनमा ल्याइएको उनले उल्लेख गरे । क्षयरोग जस्ता विभिन्न सर्ने रोगहरू एवं उच्च रक्तचाप, मधुमेह, क्यान्सर जस्ता विभिन्न नसर्ने रोगको समुदायस्तरमा परीक्षण गरी समयमै निदान गर्ने गरी विशेष स्क्रिनिङ कार्यक्रम सञ्चालनमा गरिएको उनले बताए ।