पोखरा ।

पोखराको हिलसाइड इङ्लिस स्कुलमा ६० ‌औं राष्ट्रिय बाल दिवसको अवसर पारेर समाचार वाचनदेखि सामुदायिक सचेतनासम्मका कार्यक्रम भएका छन् ।

विद्यालय प्राङ्गण तथा मालेपाटनका विभिन्न चोक र टोलमा कार्यक्रम गरिएको हो । दिवसको पूर्व सन्ध्यामा विद्यालयमा गठित नेपाल युवा रेडक्रस सर्कलको आयोजनामा शुक्रबार अंग्रेजी भाषामा समाचार वाचन प्रतियोगिता सञ्चालन गरिएको थियो ।

उक्त कार्यक्रममा कक्षा ८ र ९ तर्फ सविन पौडेल विजयी भएका थिए भने उपविजेताको पुरस्कार वृन्दा शर्माले हात पारिन् । कक्षा ७ र ८ तर्फ प्रथम आडिल भट्टराई, द्वितीय युवराज भण्डारी र तृतीय स्थान ईशान सुवेदी बने ।

हिलसाइड स्काउट ट्रुपको आयोजनामा बाल दिवसकै अवसरमा शनिबार सामुदायिक सचेतना दिइएको छ । स्काउटमा आबद्ध विद्यार्थीले मालेपाटनका बरालचोक र गोलचौताराका बासिन्दासँग बाल गतिविधिबारे साक्षत्कार गरेका थिए । प्रश्नावली नै बनाएर समुदायमा रहेका बाल क्रियाकलापसम्बन्धी विवरण संकलन गरिएको प्राचार्य डिल्लीराम भट्टराईले बताए ।

बाल दिवसकै अवसरमा विद्यालयमा कवितावाचन, वक्तृत्वकला, चित्रकला लगायतका कार्यक्रम भएका छन् । विद्यालय व्यवस्थापन समितिका अध्यक्ष बाबुराम बरालको अध्यक्षता कार्यक्रम भएका हुन् ।