पोखरा ।

नेपाल खेलकुद पत्रकार मञ्च गण्डकीको पत्रकार कल्याणकारी अक्षयकोषमा सहारा क्लबले ५१ हजार रुपैयाँ सहयोग गरेको छ । क्लबको २६ औं वार्षिकोत्सवको अवसरमा आइतबार गण्डकी प्रदेशकाा सामाजिक विकास मन्त्री विन्दुकुमार थापा र क्लब अध्यक्ष केशवराज बरालले संयुक्त रुपमा सो रकम बराबरको चेक मञ्च गण्डकी अध्यक्ष दीननाथ बराललाई हस्तान्तरण गरे ।

यसअघि मञ्च गण्डकीको अक्षयकोषमा निवर्तमान महासचिव विजय नेपालले ११ हजार १ सय ११, फोटोपत्रकार सुदर्शन रञ्जितले २५ हजार र अध्यक्ष दीननाथ बरालले १० हजार रुपैयाँ सहयोग गरेका छन् । मञ्च गण्डकीले १० लाखको अक्षयकोष स्थापना गर्ने लक्ष्य राखेको छ । कोषमा अहिले ब्याजसहित एक लाख रुपैयाँ जम्मा भएको छ ।

उक्त अवसरमा क्लबका मानार्थ सदस्य एवं अग्रज पत्रकार नारायण कार्कीले अमेरिकाको क्यान्सस राज्यको ओभरल्यान्ड पार्कमा बसोवास गर्ने नेपाली समुदायबाट संकलित २ लाख १७ हजार ९ सय ७७ रुपैयाँ बराबरको चेक हस्तान्तरण गरेका छन् ।

क्लबले यस वर्षको सहारा खेलकुद पत्रकारिता पुरस्कार परशुराम शर्मालाई प्रदान गरेको छ । उननलाई नगद २५ हजार र सम्मानपत्रसहित सम्मान गरिएको हो । नेपाल पत्रकार महासंघ कास्की अध्यक्ष विमला भण्डारीको संयोजकत्वमा गठित प्रतिभा छनोट समितिले शर्मालाई पुरस्कार दिन सिफारिस गरेको थियो ।

सहारा उत्कृष्ट सदस्य सम्मान लीलबहादुर थापालाई प्रदान गरिएको छ । थापा क्लबमा २ कार्यकालसम्म सहकोषाध्यक्ष थिए ।