पोखरा ।

सहकारी ठगी प्रकरणमा गठित संसदीय छानविन समितिले झण्डै ४ महिना लगाएर तयार पारेको प्रतिवेदन सार्बजनिक भएपछि राष्ट्रिय स्वतन्त्र पार्टीका सभापति रवि लामिछाने माथि पक्राउको तरवार झुण्डिएको छ । उनी जुन सुकै बेला पनि पक्राउ पर्न सक्ने सुरक्षा अधिकारीहरुले नै बताइरहेका छन् । कतिपयले त लामिछानेले परिवारसँग दसैं मनाउनै नपाउने दावीसम्म गर्छन् ।

संसदीय समितिले रास्वपाका सभापति लामिछाने सिधै सहकारी ठगीमा संलग्न नदेखिए पनि सरकारी ठगीबाट थुपारिएको करोडौं रकम अपचलन गरेको ठहर गर्दै प्रचलित कानुन बमोजिम कारवाही गर्न भन्दै सिफारिस गरेको छ ।

सर्वसम्मत निर्णयबाट तयार पारिएको सो प्रतिवेशन समितिका सभापति सूर्य थापाले प्रतिनिधि सभाका सभामुखलाई बुझाए लगत्तै सभामुखले कार्यान्यवयनका लागि सरकारमा पठाउने प्रस्ताव सदन गरेका थिए । लगत्तै बसेको मन्त्री परिषद् बैठकले छानविन र कारवाहीका लागि सम्बन्धित मन्त्रालयहरुमा पठाउने निर्णय गरिसकेको छ ।

प्रतिवेदन तयार भएपछि रास्वपाका नेता कार्यकर्ताले आफ्ना सभापतिले सहकारी ठगीमा क्लिन चिट पाएको दावी गर्दै हर्ष मनाइरहेका छन् । स्वयं पार्टी सभापति लामिछानेले पनि आफूले सहकारी ठगी गरेको भन्ने आरोमा एउटा पनि प्रमाण फेला नपरेको भन्दै क्लिन चिट पाएको बताउदै आएका छन् ।

तर प्रतिवेदनले सहकारीको रकम अपचलनमा रवि लामिछानेको नामै किटेर कारवाही गर्न सिफारिस गरेको छ । गोर्खा मिडिया नेटवर्क प्रालिले विभिन्न सहकारीको ६५ करोड रुपैया भन्दा बढी रकम हिनामिना गरेको र त्यसमा कम्पनीका अध्यक्ष जिबी राईसहित प्रबन्ध निर्देशक रवि लामिछाने र सञ्चालकद्वय कुमार रम्तेल र छविलाल जोशी संलग्न रहेको किटान गरेको छ ।

गोर्खा मिडियाले रवि लामिछानेकै नेतृत्वमा ग्यालेक्सी फोर के टेलिभिजन चलाएको थियो । यही टिभी चलाउनका लागि अनाधिकृत रुपमा सहकारीको करोडौं रुपैया खर्च गरिएको छ । टेलिभिजनका हर्ताकर्ता रहेका लामिछाने १५ प्रतिशत शेयरका मालिक समेत थिए । उनले त्यो शेयर स्वेट शेयर भएको दावी गरे पनि संसदीय छानविन समितिले स्वेट शेयरको व्यवस्था नेपालमा नभएको निस्कर्ष निकालेको छ ।

सहकारी ठगी अभियोयमा लामिछाने भन्दा निकै थोरै रकम अपचलन गरेका धेरै मानिसहरु पक्राउ परेका छन् भने कतिपय त पूर्पक्षका लागि जेल चलान भएका छन् । लामिछानेले भन्दा धेरै थोरै रकम अपचलन गरेको अभियोग लानगेकी राप्रपाकी सांसद गिता बस्नेत पक्राउ पूर्जी जारी भएपछि फरार छन् । बस्नेतलाई नवपुरको छिपछिपे सहकारीको करिब १६ करोड रुपैया हिनामिनामा संलग्न भएको अभियोग छ । सांसद बस्नेतको भन्दा जटिल र गम्भीर अभियोग रास्वपाका सभापतिलाई लागेको छ । त्यसैले रवि लामिछानेमाथि पनि खतराको घण्टी मडारिरहेको छ ।

रवि लामिछानेविरुद्ध गत साल नै जिल्ला प्रहरी कार्यालय कास्कीमा उजुरी परेको हो । सूर्यदर्शन सहकारी सस्था लिमिटेडका पिडित बचतकर्ताले उनी विरुद्ध पुरक उजुरी दिएका हुन । त्यसैका आधारमा थप अनुसन्धान गर्दा रकम हिनामिनामा लामिछाने पनि संलग्न भएको प्रतिवेदन तयार भएको छ ।

सूर्यदर्शन सहकारीबाट रवि लामिछानेको नाममा १ करोड रुपैया र गोर्खा मिडियामा करिव ५ करोड रुपैयाँ गएको देखिएको छ । पुरक प्रतिवेदन तयार हुँदाताका लामिछाने गृह तथा उपप्रधानमन्त्री बनेकाले अनुसन्धान प्रभावित भएको प्रहरी उच्च श्रोत बताउछ ।

तर अहिले संसदीय छानविन समितिले नामै किटेर प्रचलित कानुन बमोजिम कारवाही गर्न सिफारिस गरेपछि र मन्त्रिपरिषद्ले कार्यान्वयनका लागि गृहमन्त्रालयमा फाइल पठाएपछि भने प्रहरीलाई प्रकृया अघि बढाउन दवाव परेको छ ।

प्रहरी उच्च श्रोतले थप अनुसन्धान र कारवाहीका लागि कास्की प्रहरीलाई लेखिपठाउने बताए पनि यो समाचार तयार पार्दासम्म कास्की प्रहरीलाई माथिल्लो निकायबाट केही निर्देशन आएको छैन ।

अहिलेसम्म केही निर्देशन आएको छैन– जिल्ला प्रहरी कार्यालय कास्कीका प्रमुख, प्रहरी उपरीक्षक मोहन थापाले समाधानन्यूजसँग भने ।

सहकारीबाट गोर्खा मिडियामा अवैध तरिकाले मनिलौण्डरिङ भएको र त्यसको अधिकांश रकम रवि लामिछानेको एकल हस्ताक्षरमा चेक काटेर दुरुपयोग गरिएको छानविन समितिको निस्कर्ष छ । यसैका आधारमा रवि माथि अनुसन्धान अघि बढ्न सक्छ ।

विभिन्न मिडियामा कास्की प्रहरीलाई अनुसन्धान अघि बढाउन प्रहरी प्रधान कार्यालय अपराध अनुसन्धान महाशाखाले लेखिपठाउने भन्ने समाचार आएपनि अहिलेसम्म माथिबाट कुनै निर्देशन नआएको एसपी थापाले बताए । कस्तो खालको निर्देशन आउछ, त्यसै अनुसार अघि बढ्छौ– एसपी थापाले भने ।