पोखरा । अपांगता भएका ३४ जनासहित ९४ जना इजरायली पदयात्रीको समूहले अन्नपूर्ण फेरोमा पदयात्रा गरेको छ । १२ जना ह्विलचेयरको सहायता आवश्यक भएका तथा अन्य २२ जना अपांगता भएकासहितका पर्यटकले बिहीबार पदयात्रा सम्पन्न गरेका हुन् ।

उक्त टोलीले सेप्टेम्बर १८ मा यात्रा थालेको गरेको थियो । बिहीबार अर्थात् सेप्टेम्बर २६ को दिन उक्त पदयात्रा सफलतापूर्वक सम्पन्न भएको हो । उक्त टोलीले समुद्री सतहदेखि ११ हजार १ सय ४५ फिट उचाइमा मनाङमा हुम्दे विमानस्थलसम्म हवाई मार्गबाट यात्रा गरी त्यसपछि पदयात्रा सुरु गरेको थियो ।

यात्राको क्रममा पदयात्रीहरूले मनाङमा २ रात स्थानीय संस्कृति र परिकारको रमाइलो गर्न बिताए । उनीहरूले ५ हजार ४ सय १६ मिटर अग्लो थोरङला पास सफलतापूर्वक पार गरेका थिए ।

पदयात्रीहरूलाई त्रिभुवन अन्तर्राष्ट्रिय विमानस्थलमा राजदूत हनन गोडर र नेपाल पर्यटन बोर्डका तर्फबाट लक्ष्मण गौतमले स्वागत गरे ।