पोखरा । पोखरा महानगरपालिकाले ३४ औं अन्तर्राष्ट्रिय ज्येष्ठ नागरिक दिवस अवसरमा महानगरका २ जना ज्येष्ठ नागरिकलाई सम्मान गरेको छ । सो अवसरमा १०६ वर्षीया बसुन्धरा बराल र १०३ वर्षीय देवीदत्त तिवारीलाई महानगरले उनीहरुकौ निवासमा पुगेर सम्मान गरेको हो ।

पोखरा १३, काहुँखोलाकी बराललाई पोखरा महानगरका कावा प्रमुख मञ्जुदेवी गुरुङ र पोखरा १३ का वडा अध्यक्ष किरण बरालले नगद १४ हजार, सम्मानपत्र, माला र दोसल्ला ओढाएर सम्मान गरे । यस्तै, पोखरा ३१ का वडाध्यक्ष ढकनाथ कँडेलले ज्येष्ठ नागरिक पिताका रुपमा तिवारीलाई नगद, माला र दोसल्ला ओढाएर सम्मान गरे ।

महानगरले अन्तर्राष्ट्रिय ज्येष्ठ नागरिक दिवस अवसरमा प्रत्येक वर्ष ‘नगर पिता’ र ‘नगर माता’ रुपमा सम्मान गर्दै आएको छ ।

उपप्रमुख गुरुङले ज्येष्ठ नागरिकलाई माया, सद्भाव र सम्मान व्यक्त गर्नुपर्ने बताइन् । ज्येष्ठ नागरिकलाई परिवारका सदस्यले कुनै दुःख कष्ट नदिई पालनपोषण गर्नुपर्नेमा जोड दिँदै संविधानले ज्येष्ठ नागरिकको संरक्षणका बारेमा स्पष्ट व्यवस्था गरेको बताइन् । स्थानीय सरकार पोखरा महानगरले पनि ज्येष्ठ नागरिकको क्षेत्रमा विभिन्न कार्यक्रमहरु सञ्चालन गरिरहेको उनको भनाइ थियो ।

वडाध्यक्ष किरण बरालले आफ्नै वडाको ज्येष्ठ नागरिकलाई सम्मान पाउनु सुखद भएको बताउँदै सम्मानित व्यक्तित्वको सुस्वास्थ्य र दीर्घायुको कामना गरे । कार्यक्रममा पोखरा महानगरपालिकाको सामाजिक विकास महाशाखाका अधिकृत मञ्जु ढुंगाना, महिला विकास अधिकृत बेलकुमारी गुरुङलगायत बोलेका थिए ।