पोखरा । लागु पदार्थ र एचआइभीको क्षेत्रमा विभिन्न कार्यक्रम र सेवाहरु दिँदै आइरहेको रिचमन्ड फेलोसिप पोखराले सोबर हाउस इन्टर रिहाब सिक्स ए साइड फुटबल प्रतियोगिता गर्ने भएको छ । कात्तिक १ र २ गते, माछापोखरी खेलकुद मैदान, संगम टोल, पोखरा-१३ मा हुने प्रतियोगिताको प्रथम पुरस्कार च्याङ्ग्रा, सिल्ड र प्रमाण-पत्र र दोस्रो पुरस्कार खसी सिल्ड र प्रमाण-पत्र हुनेछ।

“लागु पदार्थ होइन, स्वास्थ्यमा ध्यान दिउँ भन्ने मुल नारालाई आत्मसात गर्दै लागु / मादक पदार्थ उपचार केन्द्रमा रहेका उपचारार्थी, स्वयम् सेवक र कर्मचारी सम्पूर्णलाई फुटबल खेलमा प्रोत्साहन गर्ने हेतुले प्रतियोगिताको आयोजना गरिएको रिचमण्ड फेलोसिपका प्रदीप बस्नेतले बताए ।

स्वस्थ्य शरीरले नै स्वस्थ्य मासिकता बनाउँने भएकाले खेलकुदमा अग्रसर हुन प्रेरित गर्ने हेतुले पोखरा भित्र रहेका लागु औषध उपचार केन्द्रहरुमा भएका फुटबल खेल प्रेमीहरुमाझ प्रतियोगिता गर्न लागिएको हो ।

प्रतियोगितामा पोखरा भित्र रहेका १२ वटा लागु औषध उपचार केन्द्रहरुले सहभागिता जनाउने छन् । यस प्रतियोगिताले उपचार केन्द्रमा रहेका सम्पूर्ण जो नशारहित रहने प्रक्रियामा रहेकाहरुको लागि शरीर र मस्तिष्कको सन्तुलन कायम राख्न मद्दत गर्नेछ, जसले गर्दा वहाँहरुको जीवन स्वस्थ र आनन्दित हुनेछ ।

विगत वि.सं. २०५५ सालदेखि लागु पदार्थ र एचआइभीको क्षेत्रमा विभिन्न कार्यक्रम र सेवाहरु दिँदै आइरहेको रिचमन्ड फेलोसिप पोखराले हालको समयमा लागु औषध र मादक पदार्थ सम्बन्धी परामर्श र उपचार केन्द्र चलाइरहेको छ ।