पोखरा ।

सहकारी ठगी अभियोगमा पक्राउ परेका रास्वपा सभापति रवि लामिछाने पोखरामा छन् । उनलाई जिल्ला प्रहरी कार्यालय कास्कीको हिरासतमा राखिएको छ । शुक्रबार राजधानीबाट पक्राउ गरेर रातारात पोखरा ल्याइएका लामिछानेलाई आज कास्की प्रहरीले अदालतमा पेश गर्नै पर्ने हुन्छ । हिरासतमा राखेर अनुसन्धान गर्न प्रहरीले अदालतबाट अनुमति लिनै पर्ने हुन्छ ।त्यसका लागि आजै दिउसो जिल्ला अदालत कास्कीमा लामिछानेलाई उपस्थित गराउने तयारी प्रहरीको छ ।

यही मौकामा अदालतलाई दवावमा पार्न पोखरामा २ थरी समुह कस्सिएका छन् । राष्ट्रिय स्वतन्त्र पार्टीका नेताहरु ठूलो संख्यामा रविको पक्षमा प्रदर्शन गरेर अदालतलाई प्रभावमा पार्न चाहान्छन् । त्यसैगरी रवि लामिछाने कै विरुद्ध किटानी जाहेरी दिने पोखराका सहकारी पीडितहरु पनि प्रदर्शनकै तयारीमा छन् । उनीहरुले पनि रविको पक्षमा उत्रने भिडबाट अदालत प्रभावित नहोस् भनेर अदालतलाई नै दवाव दिन चाहान्छन् । त्यसैले उनीहरुले पनि रविको विरुद्धमा प्रदर्शनको तयारी गरेका छन् ।

दुवै पक्षले प्रदर्शन गर्ने स्थान लगभग लगभग एकै ठाउ छ । रास्वपाले सहिद चाेकस्थित जिल्ला प्रशासन कार्यालय अघिल्तिर जम्मा हुन आव्हान गरेको छ भने सहकारी पीडितहरुले राष्ट्रबै‌क चाेकमा जम्मा हुन सूचना प्रवाह गरेको छ । दुवै पक्षको प्रदर्शन स्थल मुश्किलले ५० मिटरको दुरीमा छ ।

दुवै प्रदर्शनस्थल वरिपरी सरकारी कार्यालय भएको स्थानमा छ । गण्डकी प्रदेश सरकारको मुख्यालयसहित विभिन्न मन्त्रालय यही छन् । जिल्ला अदालत, उच्च अदालत, जिल्ला प्रशासन कार्यालय, मुख्यमन्त्रीको निवास, गण्डकी प्रदेश प्रहरी कार्यालय, वडा प्रहरी कार्यालय, राष्ट्र बैैक, आन्तरिक राजस्व कार्यालयय लगायत दर्जनौं सम्वेदनशिल कार्यालयको आसपासमा प्रदर्शन हुँदैछ ।

परिस्थिति कस्तो छ भने प्रदर्शनमा पनि राजनैतिक ध्रुवीकरण देखिएको छ । रास्वपालाई नेकपा माओवादी केन्द्र लगायत प्रतिपक्षका पार्टीका कार्यकर्ताको समर्थन छ भने सहकारी पीडितको पक्षमा कांग्रेस एमालेका कार्यकर्ता देखिएका छन् । दुवै पक्षका प्रदर्शनमा ती पार्टीका कार्यकर्ता देखिए भने पनि अनौठो नमान्दा हुन्छ ।

दुवै पक्षको प्रदर्शनमा घुसपैठको सम्भावना पनि उत्तिकै छ । केही व्यक्तिहरु राजधानीबाटै परिचालित भएर पोखरा आएको र उनिहरुले दुवै पक्षमा घुसपैठ गरेर परिस्थिति चर्काउने तयारीमा रहेको सूचनाहरु समेत प्राप्त भएका छन् । देशमा अराजक स्थिति बनोस् भन्ने चाहाना राख्ने गिरोहलाई यो भन्दा उपयुक्त मौका अर्को नहुन सक्छ । उनीहरुको त्यही अनुसारको तयारीलाई नजर अन्दाज गर्न मिल्दैन ।

परिस्थिति बिग्रन नदिनु पहिलो जिम्मेवारी गृह प्रशासनको हो । तर कास्कीको गृह प्रशासन दुवै पक्षलाई एकै स्थानमा प्रदर्शन गर्न दिएर चुकिसकेको छ । प्रदर्शनस्थल सम्वेदनशिल छ भन्ने जान्दा जान्दै पनि एउटालाई मात्र होइन् दुवै पक्षलाई एकै ठाउ स्वीकृती दिनु किमार्थ सही निर्णय हैन । त्यसैले कास्कीको गृह प्रशासन गम्भिर बन्नै पर्छ ।

दोश्रो जिम्मेवारी रास्वपा कै नेता कार्यकर्ताको हो । भाेलि देशको नेतृत्व गर्छौ भन्दै राजनीतिमा होमिएकाहरुले भिडबाट न्यायालय प्रभावित पार्न खोज्नुलाई सही भन्न सकिदै सकिन्न । त्यसमाथि धमिलो पानीमा माछा मार्ने समुह सकृय छन् भन्ने कुरा २-२ पटक गृहमन्त्री भैसकेका रवि लामिछाने र उनको पार्टीका नेतालाई थाहा छ । त्यही समुहलाई बल पुग्ने गरी सडकलाई उत्तेजित पार्ने काम नयाँ राजनीतिको मानक स्थापित गर्छौ भन्नेहरुले गर्न हुँदैन ।

तेश्राे जिम्मेवारी सहकारी पीडितहरुको हो । पोखराका सहकारी पीडित कै किटानी जाहेरीका कारण कास्की प्रहरीले दुई दुई पटक गृहमन्त्री भैसकेको मान्छेलाई सयौं कार्यकर्ताको बिचबाट पक्राउ गरेर पोखरा ल्याएको छ । उसको अनुसन्धानमा पीडितहरुले विश्वास गर्नु पर्छ । त्यसैगरी प्रहरीको माग अनुसार बहालवाला प्रतिनिधि सभा सदस्यलाई पक्राउ पुर्जी जारी गर्ने कास्की अदालत प्रति पनि सहकारी पीडितले भरोषा गर्नु पर्छ ।

चौथो दायित्व सत्तापक्ष र प्रतिपक्षका पार्टी कार्यकर्ताको हो । यो पिंध उठेको लोटा जस्तो राजनीतिमा को कहिले कति बेला सत्ता पक्ष र विपक्ष बन्छ भन्ने एकिनै नभएको बेलामा आगोमा ध्यू थप्ने काम गर्नै हुँदैन् । प्रदर्शनमा दलका कार्यकर्ता सहभागी भए भने भोलि घुसपैठ गर्नेहरुलाई कारवाहीको दायरामा ल्याउन असजिलो हुन्छ ।

पाँचौ र महत्वपूर्ण दायित्व नागरिक समाजको छ । सडकमा पक्ष र विपक्षमा हुन थालेको भिडन्त रोक्न वा राेक्नका लागि दवाव दिन नागरिक समाज चुक्नु हुँदैन । बिग्रिसकेपछि निकाल्ने सद्भाव र्याली भन्दा त्यसभन्दा पहिले गर्ने खवरदारीको मूल्य कैयौं गुणा बढी हुन्छ ।

त्यसैले सबै सजग बनौं, जिम्मेवार बनौं । सानो झिल्कोले पनि पोखरा जल्न सक्छ भन्नेमा सावधान बनौं ।