पोखरा, स्थलगत रिपोर्ट ।।

कास्की प्रहरीको हिरासतमा रहेका राष्ट्रिय स्वतन्त्र पार्टीका सभापति रवि लामिछानेलाई हिरासतमा राख्ने म्याद थप्न प्रहरीले कास्की जिल्ला अदालत लैजानै पर्ने थियो । त्यसैको विरोधमा देशभरबाट पोखरामा जम्मा भएका रास्वपाका कार्यकर्ता आइतबार १० बजेदेखि नै सहिदचाेक स्थित चाैपारी वरीपरी जम्मा हुँदै थिए ।

उता राष्ट्र बैंक चोकमा सहकारी पीडितले रवि लामिछानेका विरुद्धमा प्रर्दशन गर्दै थिए । दुवै तर्फको प्रर्दशनमा स्वार्थ समुहको घुस पैठको चर्चा चलेको थिए । दुवै तर्फ प्रर्दशनमा सहभागीहरुको संख्या अपेक्षा गरे अनुसार थिएनन् । यद्यपि सहकारी पीडित भन्दा रविका समर्थक धेरै थिए ।

सहिदचोकको वरीपरी जम्मा भएका रविका समर्थकलाई प्रहरीले घेरा हालेर राखेको थियो । भने राष्ट्र बैंक चोकमा जम्मा भएका सहकारी पीडितलाई प्रहरीले सहिदचोक तर्फ आउनबाट रोकेको थियो ।

विहान १० बजेसम्म दुवै पक्षलाई प्रदर्शन गर्न कुनै रोक नलगाएको कास्की प्रहरीले ढिला गरी साँढे ११ बजेतिर मात्र सहिदचोक र राष्ट्रबैंक चोक आसपास निषेधित क्षेत्र घोषणा गर्यो । निषेधित क्षेत्र घोषणा गर्नु अघि नै प्रदर्शनकारीले ठाउ कब्जा गरिसकेकाले त्यो आदेश कार्यान्वयन हुने अवस्था बनेन् । प्रहरीको अनुरोध प्रदर्शनकारीले टेरेनन् ।

दिउसो २ बजे तिर प्रहरीले प्रदर्शनकारी माथि सामान्य बल प्रयोग गर्ने निर्णय गर्यो । त्यसका लागि नेपाल प्रहरीको वाटर क्यानल प्रदर्शन स्थलमा ल्याइयो र ठाउ खाली गर्न सूचना प्रवाह गरियो । रवि पक्षधर आन्दोलनकारी झनै आक्रोशित बन्न थाले । अन्तत प्रहरीले प्रदर्शनकारी माथि पानीका फोहोरा प्रहार गर्न थाल्यो ।

त्यही मौकामा प्रदर्शनकारी तर्फबाट प्रहरी तर्फ एउटा पानीको बोटल प्रहार भयो । अनि रवि पक्षधर प्रदर्शनकारी आन्दोलनमा घुसपैठ भयो भन्दै एक युवा माथि जाइलागे । लात्ती र मुक्का प्रहार गर्दै युवाहरुले निर्घात कुटपिट गरे ।

पिटाई खाने व्यक्ति तस्विरमा देखिएका रातो टिसर्ट र कालो विनचिटर लगाएका युवा हुन् । उनी माथि निर्घात कुटपिट भैरहदा प्रहरी रमिते बनेको थियो ।

रास्वपाको प्रदर्शन मै खटिएका केही युवाहरुले उनलाई भिडबाट जोगाउन खोज्दै थिए । तस्विरमा देखिएका दाह्री पालेका युवासहित केहीले उनलाई भिडबाट उम्काएर प्रहरीलाई बुझाउन लैजादै थिए । त्यसक्रममा पनि उनी माथि पछाडिबाट आक्रमण भैरहेको थियो ।

अन्तत प्रहरीले ती युवालाई जिल्ला प्रशासन कार्यालयको गेट भित्र लगेर उनको उद्धार गर्यो । यद्यपी सो समाचार तयार पार्दासम्म कुटाई खाने यि युवाको पहिचान खुल्न सकेको छैन ।

आखिरमा को हुन् यी युवा ? प्रहरी माथि आक्रमण गरेर आन्दोलन भड्काउन र विथोल्न आएका घुसपैठिय भनिए पनि केही रास्वपाका कार्यकर्ताले आफ्नै पक्षका युवाले पिटाई खाएको हुन सक्ने अनुमान पनि लगाइरहेका थिए । रवि दाई कै लागि आएको जस्तो छ आक्रोशमा बोटल हान्दा अनाहकमा पिटाई खायो– एक प्रदर्शनकारीले भन्दै थिए । प्रदर्शनकारीले शंक गरे जस्तै घुसपैठ हुन् वा अनाहकमा पिटाई खाएका रविका पक्षकै प्रदर्नशनकी ? अहिलेसम्म खुल्न सकेको छैन् ।

पिटाईको भिडियो लिङ्क । सुरुको २ मिनेट २० सेकेण्ड पछि नै कुट्दै गरेको र उद्बार गर्दै गरेको दृश्य छ ।

https://fb.watch/vkEoZnp6mM