पोखरा ।
डा. बाबुराम भट्टराई नेतृत्वको नेपाल समाजवादी पार्टीको विधान अधिवेशन पोखरामा सुरु भएको छ । २ दिन चल्ने अधिवेशनको भट्टराईले सोमबार पोखरा सभागृहमा उद्घाटन गरे ।

अधिवेशनले पार्टीको प्रस्तावित विधान पारित गर्ने कार्यक्रम छ । विभिन्न जिल्लाबाट आएका झन्डै ५ सय प्रतिनिधि अधिवेशनमा सहभागी छन् । उनीहरुबीच समूह विभाजन गरी प्रस्तावित विधानमाथि छलफल चलाइएको नेसपा गण्डकी संयोजक किरण थापाले जानकारी दिएका छन् ।

नेसपा गठन भएयता पहिलोपटक अधिवेशनमार्फतै उक्त पार्टीले विधान बनाउन लागेको हो । विधान अधिवेशनले नयाँ वैकल्पिक शक्ति र समाजवादको अपरिहार्यताबारे छलफल गर्नेछ । नेसपाले आउँदो माघमा अधिवेशन गरी पार्टी संगठनका पदाधिकारीहरुसमेत औपचारिक रुपमा चयन गर्ने भएको छ ।