पोखरा। डोनाल्ड ट्रम्प दोस्रो पटक अमेरिकाको राष्ट्रपति बनेका छन् । राष्ट्रपतिमा डेमोक्रेटिक उम्मेदवार कमला ह्यारिसलाई पछार्दै ट्रम्प दोस्रो पटक राष्ट्रपति बनेका हुन् ।

उनी यसअघिको चुनावमा जो बाइडेनसँग पराजित भएको भए पनि त्यसअघिको कार्यकालमा हिलरी क्लिन्टनलाई पराजित गर्दै राष्ट्रपति बनेका हुन् ।

उनले कुल ५० राज्यका ५ सय ३८ मध्ये २ सय ७० इलेक्टोरल भोटको बहुमत प्राप्त गर्नुपर्नेमा त्यो भन्दा बढी भोट जितेका हुन् । ७ स्विङ राज्यमासमेत ट्रम्प हावी भएपछि ह्यारिसले जित्ने कुनै ठाउँ नै नरहेको हो । ट्रम्पले २ सय ७९ र ह्यरिसले २ सय २३ भोट जितेकी छिन् ।

योसँगै अमेरिकी २ सय ३० वर्षे इतिहासमा फेरि पनि पुरुष नै हावी भएका हुन् । अमेरिकी राजनीतिमा अहिलेसम्म कुनै पनि महिला राष्ट्रपति भएका छैनन् ।

ह्यारिस वर्तमान उपराष्ट्रपति हुन् । योसँगै उनको राजनीतिक उछाल तत्कालका लागि रोकिएको छ ।

संसदीय चुनावमा पनि ट्रम्पकै रिपब्लिकन अगाडि रह्यो । हाउस अफ रिप्रिजेन्टेटिभमा रिपब्लिकनले २ सय १ तथा डेमोक्रेटिकले १७७ सिट जित्दा सिनेटमा रिपब्लिकनले ५१ तथा डेमोक्रेटिकले ४२ सिट जितेको छ ।

सिनेटमा रिपब्लिकनले बहुमत हासिल गरिसकेको छ ।