पोखरा ।
देशभर विभिन्न स्थानमा रिक्त जनप्रतिनिधिका ठाउँमा आउँदो मंसिर १६ गते उपनिर्वाचन हुँदै छ । देशभर रिक्त भएका विभिन्न ४४ रिक्त पदका लागि उक्त दिन निर्वाचन हुँदै छ । त्यस क्रममा गण्डकीको एक ठाउँमा मात्रै उपनिर्वाचन हुनेछ । त्यो हो—गोरखा नगरपालिकाको वडा नम्बर ५ । उक्त निर्वाचनका लागि दलहरु उम्मेदवारको टुंगो लगाउने तयारीमा छन् ।

गोखरा ५ का तत्कालीन वडाध्यक्ष खिलबहादुर रानाको गत वर्ष निधन भएको थियो । उक्त पदका लागि पनि उपनिर्वाचन हुन लागेको छ । निर्वाचन आयोगले उपनिर्वाचन प्रयोजनका लागि मंसिर २ गते उम्मेदवारी दर्ताको कार्यतालिका सार्वजनिक गरेको छ । आयोगले गरेको आह्वान अनुसार दल दर्ताको काम भने सकिएको छ ।

गोरखा ५ का दिवंगत वडाध्यक्ष राना एमालेका तर्फबाट निर्वाचित थिए । उनको ठाउँमा एमालेले उनकै पत्नी दुर्गामाया थापा रानालाई उम्मेदवार बनाउने चर्चा छ । एमाले वडा कमिटीले उनीसहित वडा कमिटी अध्यक्ष होमबहादुर थापा र मानबहादुर रानाको नाम सिफारिस गरेको जिल्ला कमिटी अध्यक्ष सुरेन्द्र थापाले जानकारी दिए । एमालेले २३ गते उम्मेदवार टुंगो लगाउने जनाएको छ ।

नेपाली कांग्रेसले भाइकाजी आलेलाई उठाउने पक्का गरिसकेको छ । वडा इकाई समितिबाट आलेको नाम सर्वसम्मत सिफारिस भएर आएको नेपाली कांग्रेस गोरखा जिल्ला समिति सचिव किशोरजंग थापाले जानकारी दिए ।

नेकपा माओवादी केन्द्रबाट विष्णु राना र रामशरण बानियाँको नाम चर्चामा छ । उनीहरुमध्ये एक जनाकै नाम टुंगो लगाएर प्रदेश कमिटीमा सिफारिस गरिने जानकारी माओवादी केन्द्र गोरखाका इन्चार्ज अमर गुरुङ ‘रमण’ले जानकारी दिए ।

राष्ट्रिय स्वतन्त्र पार्टीले बुधबारसम्म उम्मेदवार टुंगो लगाइसकेको छैन । रास्वपा गण्डकीका महामन्त्री नवीन त्रिपाठीले उम्मेदवार चयनका लागि जिल्लाबाट नाम सिफारिस मागिएको जानकारी दिए । उनकै भनाइमा जिल्लाले बिहीबारसम्म नाम सिफरिस गर्ने छ । निर्वाचन जित्ने उम्मेदवारको खोजी जारी रहेको रास्वपा गोरखा संयोजक सुवर्ण क्षेत्रीले बताए । ‘जो पायो त्यसैलाई उम्मेदवार बनाउने कुरा भएन, जित्न सक्ने उम्मेदवार भेट्न मुस्किल भइरहेको छ,’ उनले भने ।

२०७९ को स्थानीय तह निर्वाचनमा गोरखा ५ मा खिलबहादुर राना ४५३ मत ल्याएर निर्वाचित भएका थिए । उनका प्रत्यासी उम्मेदवार नेपाली कांग्रेसकी गीता थापा मगरले ४२८ मत ल्याएकी थिइन् । जिल्ला समन्वय समितिका प्रमुख २, गाउँपालिका अध्यक्ष २, उपाध्यक्ष ४, नगरपालिका प्रमुख १, उपप्रमुख १ र वडाध्यक्ष ३४ गरी जम्मा ४४ रिक्त पदका लागि मंसिर १६ गते निर्वाचन हुनेछ ।

स्थानीय तह निर्वाचन ऐन, २०७३ मा जिल्ला समन्वय समितिका प्रमुख, उपप्रमुख, गाउँपालिका अध्यक्ष, उपाध्यक्ष, नगरपालिका प्रमुख, उपपप्रमुख र वडाध्यक्षको पदावधि समाप्त नहुँदै निजको पद कुनै कारणले रिक्त भएमा र एक वर्षभन्दा बढी पदावधि बाँकी रहेको अवस्थामा बाँकी अवधिका लागि उपनिर्वाचनद्वारा पदपूर्ति हुने व्यवस्था छ ।

आयोगका अनुसार २०७९ मा सम्पन्न स्थानीय तहको निर्वाचनमा पुरुष उम्मेदवार निर्वाचित भई कार्यभार सम्हालिरहेको स्थानीय तहमा रिक्त रहेको पदमा महिला उम्मेदवार रहने गरी मनोनयनपत्र पेस गर्न राजनीतिक दललाई निर्देशन दिइएको छ ।