पाेखरा ।

पोखरा अन्तर्राष्ट्रिय विमानस्थलमा एक वर्ष पछि पुनः चीनबाट बिहीबार चाटर्ड फ्लाइट हुने भएको छ । पोखरामा हुने तेस्रो क्रस कन्ट्री दौडका लागि खेलाडी सहितका केही अतिथिहरु लिएर सिचुवान एयरलाइन्सकाे विमान र्चाटर्ड गरेर आउन लागेकाे प्रतियोगिताका संयोजक विश्वशंकर पालिखेले बताए ।

चीनको कुनमिङ शहरबाट उडेकाे विमान सिधै पोखरा अन्तर्राष्ट्रिय विमानस्थलमा अवतरण गर्ने भएको पोखरा अन्तर्राष्ट्रिय विमानस्थलका उपनिर्देशक जशोधा सुवेदीले जानकारी दिइन् । उनका अनुसार दिउसो २ः४० बजे एयरबस ३१९ नम्बरको विमान पोखरा आएसंगै दिउँसो ४ः१५ बजे रित्तै काठमाण्डौं तर्फ प्रस्थान गर्ने समय तालिका रहेको छ ।

नेपाल चिन मैत्रि संघका अध्यक्ष एव दौड प्रतियोगिता संयोजक विश्वशंकर पालिखेले खेलको माध्यमबाट पोखरा र यस आसपासका क्षेत्रमा खेल पर्यटनको प्रबद्र्धन हुने विश्वास व्यक्त गरे ।

पोखरामा अन्तर्राष्ट्रिय विमानस्थलबाट नियमित रुपमा अन्तराष्ट्रिय हवाई उडान हुन सकेकाे छैन । नेपाल सरकारले करिब २२ अर्बको ऋणमा निर्माण गरेको उक्त विमानस्थल संचालनमा आएको करिब दुई वर्ष पुग्दै गर्दा ८ वटा मात्र चाटर्ड फ्लाईट भएको छ । यस अघि ७ वटा अन्तराष्ट्रिय हवाई उडानको चाटर्ड फ्लाईट भएको थियो ।