पोखरा ।

जापानको विश्वविख्यात कम्पनी कोमात्सुले आफ्नो नयाँ उत्पादन ‘कोमात्सु पिसी २०५—१०एमओ’ नेपालमा सार्वजनिक गरेको छ । कोमात्सुले भारतमा सन् २०२३ मा सार्वजनिक गरेको मेसिनमा नेपालमाचाहिँ पोखराबाट बजारमा बिक्री सुरुआत गरेको हो ।

कोमात्सु इन्डियाका एमडी यासुनोरी फुजी, महेश मुरलीधरन, कोमात्सुको नेपालका लागि आधिकारिक बिक्रेता कन्टिनेन्टल ग्रुपका अध्यक्ष सुहृदराज घिमिरे र कोमात्सुका लागि गण्डकीको बिक्रेता अटोवेज प्रालिका अध्यक्ष नारायण पौडेलले उक्त मेसिन बिहीबार पोखरामा सार्वजनिक गरे ।

‘कोमात्सु पिसी २१०—१०एमओ’ निर्माण क्षेत्रमा उपयोगी मेसिन हो । यो मेसिनको मूल्य १ करोड १५ लाख रुपैयाँ निर्धारण गरिएको छ ।

कोमात्सु इन्डियाका महेश मुरलीधरनले यो मेसिन भारतमा एक वर्षमा ५०० वटा बिक्री भइसकेको जानकारी दिए । उनले यो मेसिन सुरुआती थोरै लगानीको तर धेरै प्रभावकारी भएको पनि सुनाए । मेसिन इन्धन किफायतीसमेत रहेको उनको भनाइ थियो ।

कोमात्सु इन्डियाका एमडी यासुनोरी फुजीले आफ्नो उत्पादनका प्रयोगकर्ता नै आफूहरुलाई अग्रपंक्तिमा र सधै प्राथमिकतामा रहेको जानकारी गराए । ‘उहाँहरुलाई सहयोग र सेवा हामी हाम्रो धर्म सम्झन्छौं,’ उनले भने । मेसिन भारतमा बने पनि सबै सामान जापानबाट ल्याइने जानकारी सानले दिए ।

कन्टिनेन्टल ग्रुपका अध्यक्ष सुहृदराज घिमिरेले ३५ वर्षअघि वर्षमा २/४ वटा पनि बिक्री गर्न गाह्रो हुने कोमात्सुका मेसिनहरुको गुणस्तर प्रयोगकर्ताले थाहा पाइसकेपछि माग नै धान्न गाह्रो भएको अनुभव साटे । उनले सुरुमा सस्तो पर्ने मेसिन टिकाउ नहुने र झन् बढी खर्च ल्याउने हुँदा कोमात्सुका गुणस्तरीय मेसिन प्रयोग गरे वर्षाैं वर्ष टिक्ने बताए । कोमात्सुका मेसिन ३० हजार घन्टा चलेपछि मात्रै पूरै मर्मत गर्नुपर्ने र सधैं शुद्ध इन्धन तथा लुब्रिकेन्ट प्रयोग गर्नुपर्ने जानकारी दिए ।

अटोवेज प्रालि पोखराका अध्यक्ष नारायण पौडेलले कोमात्सुले नयाँ उत्पादन सार्वजनिक गर्न पोखरा रोज्नु गर्वको कुरा भएको विचार राखे । कोमात्सुका उत्पादन सबै हिसाबले गुणस्तरीय र उत्कृष्ट रहेको उनको भनाइ थियो । ‘कोमात्सुका मेसिनमा २५/३० वर्षसम्म पनि कुनै समस्या आउँदैनन्,’ उनले भने ।