पोखरा । पोखराको इमेज सहकारी ठगी प्रकरणका मुख्य आरोपित देवकुमार नेपालीलाई आइतबार बिहान पोखरा ल्याइएको छ । बागलुङ जिल्ला अदालतको आदेशबाट पुर्पक्षका लागि थुनामा रहेका नेपालीलाई प्रहरीले पोखरा ल्याएर सरकारी वकिलको कार्यालयमा बयान लिन सुरु गरेको छ । अहिले भने उनलाई सूर्यदर्शन सहकारी ठगी प्रकरणमा बयान थालिएको हो । उनी पोखराको सूर्यदर्शन सहकारीका पूर्व उपाध्यक्ष हुन् ।

सूर्यदर्शन सहकारीको अध्यक्ष हुने इच्छा पूरा नभएपछि उनले बागलुङ र पोखरामा इमेज सहकारी खोलेका थिए । २ ठाउँका इमेज सहकारीबाट २ अर्बभन्दा धेरै रकम अपचलन गरेको आरोप उनीमाथि छ ।

सहकारीको रकम हिनामिना पारी भागेका नेपालीलाई पक्राउ गर्न प्रहरीले रेडकर्नर नोटिस जारी गरेको थियो । उनलाई गत असोज ११ गते भारतमा पक्राउ गरी ल्याइएको थियो ।