पोखरा । पोखराको जनप्रिय बहुमुखी क्याम्पस प्रमुखमा कृष्णबाबु बराल नियुक्त भएका छन् । क्याम्पस सञ्चालक समितिको आइतबारको बैठकले बराललाई प्रमुखमा नियुक्त गरेको हो । व्यवस्थापन विषय प्राध्यापन गर्दै आएका बरालले यसअघि निमित्त क्याम्पस प्रमुखको जिम्मेवारी समेत निभाएका थिए ।

क्याम्पस प्रमुख लोकराज भण्डारीको कार्यकाल सकिएपछि निमित्तको भरमा चल्दै आएको थियो ।

२ कार्यकाल बिबिए संयोजक र २ कार्यकाल सहायक क्याम्पस प्रमुख बराल पोखराकै बासिन्दा हुन् । उनले २०६५ सालदेखि त्यहाँ पढाउँदै आएका छन् । उनी जनप्रिय क्याम्पसकै पूर्व विद्यार्थी हुन् । नवनियुक्त प्रमुख बराललाई क्याम्पस सञ्चालक समिति अध्यक्ष वीरेन्द्रनारायण विजुक्छेले आइतबारै पद तथा गोपनियताको शपथ गराएका छन् ।

स्वायत्त कार्यक्रमअन्तर्गत विषय थप गर्ने र मानीत विश्वविद्यालय बनाउने लक्ष्य आफूले लिएको क्याम्पस प्रमुख बरालले बताए । प्रमुखको कार्यकाल ४ वर्षे हुन्छ ।

क्याम्पसले त्रिविको सम्बन्धन र विश्वविद्यालय अनुदान आयोगबाट गुणस्तर मान्यता प्राप्त गरेको छ । स्वायत्त कार्यक्रमअन्तर्गत एमबिए इन हस्पिट्यालिटी म्यानेजमेन्ट र स्नातक तह पर्वतीय पर्यटन व्यवस्थापन (बिएमटिएम) शैक्षिक कार्यक्रम सञ्चालन गरिरहेको छ । यहाँ करिब ४५ सयभन्दा बढी विद्यार्थी अध्ययन गर्छन् । जनप्रियमा १सय ५० प्राध्यापक र ३८ जना कर्मचारी कार्यरत छन् ।