पाेखरा ।

गण्डकी प्रदेशसभा सदस्य दीपक मनाङे पक्राउ परेका छन् । प्रहरीले मनाङेलाई मंगलबार काठमाडौंको सानोभर्‍याङबाट पक्राउ गरेको हो । सर्वोच्च अदालतले उनीविरुद्धको मुद्दामा कात्तिक २० गते फैसला गर्दै दोषी ठहर गरेको थियो ।

२ दसकअघि चक्रे मिलन भनिने मिलन गुरुङमाथि सांघातिक आक्रमण गरी ज्यान मार्ने उद्योग गरेको मुद्दा मनाङेमाथि लागेको हो । २०६१ वैशाख २१ गते चक्रे मिलन उर्फ मिलन गुरुङमाथि धारिलो हतियार प्रहार भएको थियो ।

उक्त मुद्दामा उच्च अदालत पाटनको फैसला अनुसार केही समय उनी कारागारसमेत बसिसकेका छन् । सर्वोच्चले उच्चकै फैसला सदर गरेको हो । उनलाई ५ वर्षको कारागार सजाय अदालतले सुनाएको छ ।

२०७९ को प्रदेश सभा निर्वाचनमा मनाङे मनाङ जिल्लाको प्रदेश सभामा ‘ख’ स्वतन्त्र उम्मेदवार थिए । उनी निर्विरोध निर्वाचत भएका हुन् । पछि माधव नेपाल नेतृत्वको नेकपा एस प्रवेश गरेका उनले केही समयमै उक्त पार्टीसमेत परित्याग गरेका थिए । मनाङे पहिलो प्रदेश सभा र दोस्रोपटकको कार्यकाल गरी ६ पटक मन्त्री भइसकेका छन् ।