पाेखरा ।

राष्ट्रिय स्वतन्त्र पार्टी (रास्वपा) का सभापति रवि लामिछानेलाई अनुसन्धानका लागि रुपन्देहीमा लगिएको छ । सभापति लामिछानेलाई मंगलबार पोखराबाट बुद्ध एयरको जहाजमार्फत रुपन्देही लगिएको हो ।

बुटवलमा रहेको सुप्रिम सहकारीको रकम हिनामिनामा संलग्न रहेको आरोपमा लामिछानेलाई रुपन्देही लगिएको हो । गोर्खा मिडिया नेटवर्क प्रालिमा लामिछाने प्रबन्ध निर्देशक रहदाँ सहकारीकाे रकम अपचलन गरेको आरोप छ ।

लामिछानेलाई विगत २६ दिनदेखि कास्की प्रहरीले सहकारी ठगी तथा संगठित अपराध कसुरमा अनुसन्धान गरिरहेको छ ।

रास्वपा लुम्बिनी प्रदेशले भैरहवाको लुम्बिनी गेटमा प्रदर्शन गरिरहेको छ । सुप्रिम बचत तथा ऋण सहकारी संस्थाका पीडितहरूले पनि भैरहवामै प्रदर्शनको तयारी गरिरहेका छन् ।

गत कार्तिक २ गते पार्टी कार्यालय चःमतिबाट पक्राउ गरिएका लामिछानेलाई भने अदालतबाट चारपटक म्याद थप गरी जिल्ला प्रहरी कार्यालय कास्कीले अनुसन्धान गरिरहेको छ । पछिल्लो पटक आइतबार कास्की जिल्ला अदालतले लामिछाने माथी अनुसन्धान गर्न थप १३ दिन हिरासत राख्न अनुमति दिएको थियो ।