पोखरा । ज्यान मार्ने उद्योगमा सर्वोच्च अदालतबाट दोषी ठहर गण्डकी प्रदेशका सांसद तथा पूर्वमन्त्री राजीव गुरुङ (दीपक मनाङे) मंगलबार कारागार चलान भएका छन् । बिहान काठमाडौंबाट पक्राउ परेका उनी दिउँसो कारागार चलान भएको हो ।

मनाङेलाई ज्यान मार्ने उद्योगमा कात्तिक २० गते सर्वोच्च अदालतले दोषी ठहर गरी ५ वर्ष कैद सुनाएको छ । २०६९ मा पाटन अदालतले गरेको फैसला नै सर्वोच्चबाट सदर भएको हो ।

मनाङे दोषी ठहर भएर कारागार गइसक्दा समेत उनको पद भने गएको छैन । सर्वोच्च अदालतले सांसद दोषी ठहरिएको जानकारी प्रदेश सभालाई पठाएको छैन ।

गण्डकी प्रदेश सभाका सभामुख कृष्ण धितालले सर्वोच्च अदालतको पत्र सचिवालयमा नआएको बताए । पत्र नआएसम्म कारवाही गर्न नमिल्ने उनकाे भनाइ थियो ।