पोखरा । नेपालका लागि फ्रान्सकी राजदूत भर्जिनी कोर्टेभाललले बिहीबार पोखरा महानगरपालिकाका प्रमुख धनराज आचार्यसँग भेटवार्ता गरेकी छन् । पहिलो पटक पोखरा आएकी राजदूत कोर्टेभल र नगर प्रमुख आचार्यबीच दुईपक्षीय हितका विषयमा छलफल भएको छ ।

विशेष गरी अन्नपूर्ण हिमाल आरोहणको ७५ औं वर्षको अवसरमा पोखरामा विशेष कार्यक्रम आयोजना गर्ने सन्दर्भमा छलफल केन्द्रित भएको नगर प्रमुख आचार्यले बताए । फ्रान्सेली नागरिक मौरिस हर्जाेगले पहिलो पटक अन्नपूर्ण हिमालको आरोहण गरी पर्वतारोहणको इतिहास कोरेका थिए । त्यसको ३ वर्षपछि मात्रै सगरमाथा आरोहण गरिएको इतिहास छ ।

हर्जाेगले अन्नपूर्ण–१ (प्रथम) हिमालको सफल आरोहण गरेको ७४ वर्ष पूरा भएको छ । सन् २०२५ मा हिमाल आरोहणको ७५ औं वर्षगाँठमा विशेष कार्यक्रम आयोजना गर्ने फ्रान्सेली सरकारको चाहाना रहेको भेटवार्तामा राजदूत कोर्टेभलले बताइन् । हर्जाेगले उनका सहयात्री लुई लिचेनेलसँग सन् १९५३ जुन ३ मा अन्नपूर्ण प्रथम पहिलो पटक आरोहण गरेका थिए ।
भेटवार्तामा अन्नपूर्ण हिमालको सफाइ अभियानमा सहकार्य गर्ने, पोखराको जियोलोजिकल सर्भेका लागि प्राविधिक सहयोगसहित आवश्यक सहकार्य गर्ने, फ्रान्सको पर्यटकीय सहर र पोखराका बीचमा मितेरी सम्बन्ध स्थापना गर्ने, फोहोर प्रशोधन तथा व्यवस्थापन परियोजनामा सहकार्य गर्ने र दुई पक्षीय पर्यटन प्रवद्र्धन तथा विकासमा सहकार्य गर्ने लगायतका विषयमा पनि छलफल भएको छ ।

भेटवार्तामा पोखरा महानगरपालिकाका प्रवक्ता मोतिलाल तिम्सिना र प्रमुख प्रशासकीय अधिकृत शिवराज चौलागाईंको समेत सहभागिता थियो । पोखरा महानगरपालिका फान्स सरकारसँग सहकार्यमा अन्नपूर्ण सफाइ अभियानदेखि समग्र पर्यटन प्रवद्र्धनमा सहकार्य गर्न तत्पर रहेको नगर प्रमुख आचार्यले बताए ।