पोखरा ।

पोखराका स्थापित व्यवसायी एवं समाजसेवी स्वर्गीय दोर्णराज अधिकारीको स्मृतिमा उनको परिवारले अक्षयकोष स्थापना गरेका छन् । अधिकारीको १३ औं दिनको पुण्य तिथिमा अक्षयकोषको घोषणा गरिएको हो ।

बस व्यवसायीका रुपमा आफ्नो पहिचान बनाएर विभिन्न प्रतिष्ठानमा संलग्न अधिकारी परिवारलाई स्वर्गीय दोर्णराजले २०३३ सालदेखि नै यातायात व्यवसायमा प्रवेश गराएका थिए । अहिले उनको परिवार जगदम्भा ट्राभल्स, शुभजगदम्भा ट्राभल्स, मोर्डन ईरा टुर्स एण्ड ट्राभल्स लगायतका प्रतिष्ठानबाट नेपाल र भारतमा यातायात सेवा प्रवाहमा सकृय छ ।

बुबाले परिवारलाई यातायात व्यवसायीका रुपमा स्थापित गराएरको मात्र नभएर गण्डकी क्षेत्रको यातायात व्यवसायको विकास र बिस्तारमा ठूलो योगदान दिनु भएको छ भन्दै जेठा छोरा धर्मराज अधिकारीले बुवालाई जिवन्त राखिराख्न अक्षयकोष स्थापना गरिएको बताए ।

सो अक्षयकोषको सञ्चालन पृथ्विराज मार्ग बस व्यवसायी कम्पनीले गर्ने समझदारी भएको छ । सो कोषबाट हरेक वर्ष एक जना पत्रकारलाई सम्मान गरिने अधिकारीले बताए । यातायात व्यवसायी यातायात मजदुर र सेवाग्राहीको पक्षमा कलम चलाउने एक जना पत्रकारलाई हरेक बर्ष सम्मान गर्ने गरी कार्यविधि बनाएर अक्षयकोष चलाइने अधिकारीले बताए ।

अधिकारी परिवारले बुबाको १३ ‍औं दिनको पुण्य तिथिका अवसरमा बिउ पुजीका रुपमा पृथ्विराज मार्ग बस व्यवसायी कम्पनीका अध्यक्ष योगेन्द्र केसीलाई ५० हजार रुपैया नदग हस्तान्तरण गरे । आगामी दिनमा अक्षयकोषमा रकम थप्दै जाने घोषणा गर्दै आगामी वर्षदेखि नै पत्रकारलाई पुरस्कृत गरिने बताए ।

अक्षयकोषको बिउपुजी बुझ्दै कम्पनीका अध्यक्ष केसीले यस क्षेत्रको यातायात व्यवसायको विकासका लागि अविस्मरणीय योगदान पुराउनु भएका दोर्णराज अधिकारीको स्मृतिमा स्थापित अक्षयकोष स्थापना हुँदा सिङ्गो यातायात क्षेत्र गौरवान्वित भएको बताए ।

स्वर्गीय अधिकारीका धर्म केशव दामु र बुद्धि गरी ४ भाइ छोरा छन् । चारै जना यातायात व्यवसायमा आवद्ध छन् ।