पोखरा । घरबाट स्कुल हिँडेका पोखरा ३२ तल्लो गगनगौंडा खुदीका १४ वर्षे बालक ५ दिनदेखि बेपत्ता छन् । राजाको चौतारामा रहेको व्रह्मरुपा माविको कक्षा ७ मा अध्ययनरत रविन परियार कात्तिक २८ गतेबाट हराएका हुन् ।

साथीभाइ, आफन्त र चिनजानकाहरुको घरमा समेत नभेटिएपछि आमा बिना र राजकुमार छोराको खोजीमा भौंतारिएका छन् । कात्तिक २८ गते बिहान खाना खाइवरी स्कुलको ड्रेस लगाएर झोला बोकेर उनी घरबाट निस्केका थिए । स्कुल र घरबीचको दुरी २ किलोमिटर पनि छैन । घरबाट निस्केका रविनले नजिकै साथीकोमा गएर ड्रेसको कपडा फेरेर साथीकै कपडा लगाएर निस्केका थिए । उनी साथीलाई समेत कहाँ जान्छु भनेर नभनेको बाबु राजकुमारले बताए । कहिले प्रहरी कार्यालय, कहिले सम्भावित ठाउँहरुमा पुगेका उनीहरु आइतबार समाधान दैनिकको कार्यालयमा आएर खोजीका लागि सहयोग मागेका छन् ।

झनक्क रिसाउने स्वभावको भए पनि परिवारमा त्यस्तो मुटाव नभएको आमा बिनाले बताइन् । ‘बाबु हराउने बित्तिकै माइती अर्मलातिर खबर गरें, सबैजना आउनुभयो, निकै खोजियो, बाबु भेटिएको छैन,’ मलिन मुहार पारेर उनले भनिन् । अरु दिन स्कुल जान्न भनेर कनकन गर्ने रविन त्यो दिन भने हाँसीखुसी घरबाट निस्केको आमा बिनाको भनाइ थियो ।

खोजी गरिदिन निवेदन परेपछि जिल्ला प्रहरी कार्यालय कास्कीको महिला, बालबालिका तथा ज्येष्ठ नागरिक सेवा केन्द्रले समेत सूचना जारी गरेको छ । साथीको घरबाट हिँड्दा उनले पहेंलो र खरानी रङको टिसर्ट, खरानी रङको पाइन्ट र चप्पल लगाएका छन् । साढे ४ फिट उचाइका रविनको शरीर मझौला छ ।