पोखरा ।
पोखरा १२ भद्रकाली मार्गमा रहेको पोखरा युनाइटेड एकेडेमीमा वार्षिक स्पोटेर्स मिट २०८१ सुरु भएको छ । तीन दिनसम्म सञ्चालन हुने उक्त स्पोटेर्स मिटको बुधबार सांसद मनबहादुर गुरुङले उद्घाटन गर्दै विद्यालयले शिक्षासँगै खेलाडी उत्पादनका लागि विभिन्न खेलकुद गतिविधि गर्नुपर्नेमा जोड दिए ।

उनले हरेक व्यक्तिसँग विभिन्न क्षमता हुने हुँदा आफ्नो प्रतिभा प्रष्फुटन गर्न विद्यार्थीहरुमा आग्रह गरे । सांसद गुरुङले नेपालका सन्दीप लामिछाने, सावित्रा भण्डारीदेखि विदेशी खेलाडी मेसी, रोनाल्डो जस्ता खेलाडीहरु पोखराले पनि उत्पादन गर्न सक्ने दाबी गरे ।

कार्यक्रममा प्रदेश खेलकुद परिषद गण्डकीका उपाध्यक्ष धोजकुमार गुरुङले कुनै पनि खेलकुद प्रतियोगिताहरुमा सहभागी हुनु ठूलो कुरा भएको उल्लेख गरे । प्रिन्सिपल बयनबहादुर गोदारले विद्यार्थीहरुको शिक्षासँगै अतिरिक्त क्रियाकलापमा जोड दिन उक्त कार्यक्रम वार्षिक रुपमा आयोजना गर्दै आएको सुनाए ।

विद्यालय व्यवस्थापन समितिका अध्यक्ष शिवबहादुर भण्डारीको अध्यक्षतामा सम्पन्न भएको उद्घाटन सत्रमा विद्यालयका सहप्रध्यानाध्यापक देवेन्द्र अधिकारी, शिक्षक फणीन्द्रराज पौडेलले लगायतले शिक्षासँगै खेलकुदको महत्वको बारेमा चर्चा गरे । शुक्रबारसम्म चल्ने उक्त स्पोट्र्स मिटमा फुटबल, भलिबल, बास्केटबल लगायत विभिन्न प्रतियोगिताहरु हुने भएको छ ।