पोखरा । काठमाडौैको कालिमाटीस्थित स्वर्णलक्ष्मी बहुउद्देश्यीय सहकारीको रकम अपचलनमा संलग्न पूर्व डिआइजी छविलाल जोशीसँग प्रहरीले बयान लिएको छ । मंसिर ४ मा उनलाई काठमाडौँमा लगेर जिल्ला प्रहरी परिसर काठमाडौंका अनुसन्धान अधिकृत र सरकारी वकिलले बयान लिएका हुन् ।

उनीसँगको बयान सकिएको अनुसन्धानमा संलग्न जिल्ला प्रहरी परिसर काठमाडौंका एक अधिकृतले बताए । प्रहरीले उनलाई शुक्रबार नै पोखरा ल्याउने भएको छ । जोशीमाथि प्रहरीले पोखराको सूर्यदर्शन सहकारी र बुटवलको सुप्रिम सहकारीको रकम अपचलनबारे पनि अनुसन्धान गरिरहेको छ ।

स्वर्णलक्ष्मी बहुउद्देश्यीय सहकारी संस्थाको रकम गोरखा मिडिया नेटवर्कमा अवैध तरिकाले गएको भेटिएको छ । प्रारम्भिक अनुसन्धानबाट १ करोड ८२ लाख गोरखा मिडियामा अवैध तरिकाले लगेर अपचलन गरेको भेटिएको अनुसन्धानमा संलग्न जिल्ला प्रहरी परिसर काठमाडौंका एक अधिकृतले बताए । स्वर्णलक्ष्मीका ६ सय ४५ जना बचतकर्ताले प्रहरीमा जाहेरी दिएका छन् ।