जोमसोम ।
प्रसिद्ध धार्मिक स्थल मुक्तिनाथ मन्दिरमा एक भारतीय भक्तजनले लाखौं मूल्य बराबरको सुनचाँदीको सामग्री भेटी दान गरेका छन् । भारतको गोवाबाट आएका विश्वजीत प्रताप राठोले आइतबार सुनचाँदीबाट बनेको अलग/अलग सामग्री मुक्तिनाथमा चढाएका हुन् ।

राठोले आइतबार बिहान मुक्तिनाथ मन्दिरमा आधा किलो सुनबाट बनाइएको दुई थान कमलको फूल आकारको सामग्री र अर्को साढे २ केजी चाँदीबाट बनाइएको स्ट्यान्डसहितको एक थान शिवलिंग चढाएको मुक्तिनाथ विकास समितिका अध्यक्ष एवं मुस्ताङका प्रमुख जिल्ला अधिकारी विष्णुप्रसाद भुसालले जानकारी दिए । सुन र चाँदीले बनेको अलगअलग सामग्रीको मूल्य अनुमानित ६८ लाख रुपैयाँ बराबर हुन आउने प्रजिअ भुसालले उल्लेख गरे ।

मुक्तिनाथमा चढाएको उक्त भेटी व्यवस्थापनका लागि मुस्ताङका प्रजिअ भुसालसहित जिल्ला प्रहरी कार्यालय मुस्ताङका प्रहरी प्रमुख डिएसपी सूर्यबहादुर बोगटी, मुक्तिनाथ विकास समितिका सदस्य सचिव सूर्य शर्मा अर्याल र वारागुङ मुक्तिक्षेत्रका प्रमुख प्रशासकीय अधिकृत देवेन्द्र पाण्डे मुक्तिनाथ पुगेका थिए ।

भारतीय भक्तजनले चढाएको सुन चाँदीका सामग्री उपहार व्यवस्थापनका लागि प्रजिअ भुसालको रोहबरमा मुक्तिनाथका पुजारी र मन्दिरमा कार्यरत आनीको उपस्थिति मुचुल्का उठाएर व्यवस्थित गर्ने निर्णय गरिएको प्रजिअ भुसाले बताए । प्रजिअ भुसालले मुक्तिनाथमा चढाएको उपहार स्वरुप प्रदान गरिएको सुन र चाँदीको बिल विवरण भारतीय भक्तजन राठोसंग माग गरिएको खुलाए ।

मुक्तिनाथ विकास समिति, बारागुङ मुक्तिक्षेत्र गाउँपालिका, सुरक्षा निकाय, पुजारी र आनी सम्मिलित मुचुल्का अनुसार मन्दिरमा चढाएको सुनचाँदीको सामग्री सुरक्षा संवेदनशीलताका कारण जिल्ला प्रहरी कार्यालय मुस्ताङमा व्यवस्थापन गर्ने निर्णय गरिएको प्रजिअ भुसाले उल्लेख गरे । मुक्तिनाथ मन्दिरमै व्यवस्थापन गर्दा सुरक्षा जोखिम हुने सम्भावना भएकाले जिल्ला प्रहरी कार्यालयमा राख्ने निर्णय भएको प्रजिअ भुसालको भनाइ छ ।

मुक्तिनाथ मन्दिरमा बर्सेनि १ लाख भारतीय पर्यटक दर्शनका लागि आउने गरेको प्रहरीको तथ्यांकमा उल्लेख छ । मुक्तिनाथ विकास समितिले मन्दिर परिसरमा ५ वटा दानपेटिका राखेको छ । सयभन्दा बढी नगद दान गर्ने भक्तजनका लागि मुक्तिनाथ विकास समितिका कर्मचारीले नगद रसिद काट्छन् ।

मुक्तिनाथ संरक्षण व्यवस्थापन समितिले पनि बेग्लै भेटी चन्दा बाकस राखेको छ । मन्दिरभित्र चढाएका सुनचाँदी गरगहनाहरु त्यहाँ कार्यरत आनीहरुले व्यवस्थापन गर्छन् । भारतीय भक्तजन राठोरले प्रशासनको समन्वयमा उक्त सामग्री चढाएकाले समिति मातहतमै रहने गरी प्रहरीको जिम्मा लगाइएको हो ।