नेपाल प्रिमियर लिग (एनपिएल) जारी छ । दशौं हजार दर्शकमाझ सुरु भएको एनपिएलको उत्साह हेर्दा नेपालमा साँच्चिकै क्रिकेटको क्रेज बढ्दै गएको प्रतीत हुन्छ । मुलुकको संघीय संरचनाको समेत प्रतिनिधित्व गर्दै प्रादेशिक क्लबहरुले यो प्रतियोगितामा भाग लिएका छन् । सुदूरपश्चिमबाट सुदूरपश्चिम रोयल्स, कर्णालीबाट कर्णाली याक्स, लुम्बिनीबाट लुम्बिनी लायन्स, गण्डकीबाट पोखरा एभेन्जर्स, बागमतीबाट काठमाडौं गुर्खाज र चितवन राइनोज, मधेसबाट जनकपुर बोल्ट र कोशीबाट विराटनगर किंग्सले प्रतिनिधित्व गरेका छन् । एनपिएलमा राष्ट्रियमात्र होइन, अन्तर्राष्ट्रिय खेलाडीसमेत सहभागी छन् ।

८ फ्रेन्चाइज टिममा ४० विदेशी खेलाडी सहभागी यो खेलमा विभिन्न क्लबमार्फत एक अर्बभन्दा बढीको कारोबार हुँदै छ । यो खालको चासो, उत्साह र कारोबार नेपाली क्रिकेट क्षेत्रको विकासमा एक नयाँ कुरा हो । यति उत्साहपूर्ण रुपमा अन्तर्राष्ट्रियस्तरको खेल सुरुवात भएपछि नेपालले क्रिकेटमा आशालाग्दो भविष्य देख्न सक्छ भन्ने विश्वास गर्न सकिन्छ ।

अहिले पनि क्रिकेट क्षेत्रमा अनेक समस्या छन् । खेल मैदानको अभाव नेपालले झेल्नुपरिरहेको छ । हजारौं दर्शकले प्रत्यक्ष खेल हेर्ने मौका पाएनन् भने टिकट लिइसकेकाहरु पनि ठाउँ नहुँदा भित्र पस्न पाएनन् । सीमित पूर्वाधारबीच आयोजना गरिएको एनपिएल सरोकारवाला निकायलाई खबरदारी गर्ने माध्यम पनि बन्यो । खेलले खेलाडीलाई मात्रै उत्साहित गर्दैन, दर्शक, निजी क्षेत्र र कला क्षेत्रलाई पनि जोड्छ, भविष्यबारे सोच्ने मौका दिन्छ । यो खेल आयोजना गर्नमात्रै एक अर्ब खर्च हुने निकै ठूलो संकेत हो ।

अर्काे महात्वपूर्ण कुरा त्यो रकम सरकारी होइन, निजी क्षेत्रले बजार प्रवद्र्धनकै रुपमा खेल क्षेत्रमा लगानी गरेको छ । ८ क्लबका खेलाडीका लागि मात्रै निजी क्षेत्रले १६ करोड ८८ लाख खर्च गरेको छ । निजी क्षेत्रले खेलकुदमा लगानी गर्नु आफैंमा खेल क्षेत्रको व्यावसायिक विकासको कोसेढुंगा हो । अब निजी क्षेत्रले सरकारसँग मिलेर सार्वजनिक–निजी साझेदारी मोडलमा खेल पूर्वाधार विकासमा पनि लगानी गर्न सक्छन् भन्ने यसले देखाउँछ । त्यसरी निर्माण भएका संरचना उपयोग हुन सक्छन् भन्ने आशासमेत गर्न सकिन्छ ।

खेला ४० विदेशी खेलाडी सहभागी छन् । जसका लागि क्लबहरुले एउटै खेलाडीलाई दुई करोडभन्दा बढी रकम दिएका छन् । विश्व स्तरका चर्चित खेलाडीको सहभागिता र प्रत्यक्ष प्रसारण हुने कुराले नेपालमा पनि अन्तर्राष्ट्रिय खेल आयोजना गर्न सम्भव छ भन्नसमेत देखाएको छ । यसले नेपाल र नेपालको खेल क्षेत्रलाई नै विश्वमा चिनाउन भूमिका खेलेको छ । नेपालका खेलाडी विश्वका विभिन्न क्लबमा अनुबन्ध भएर खेल्नु नयाँ होइन तर नेपालकै क्लबहरुले पनि विश्वका चर्चित खेलाडी अनुबन्ध गर्नसक्नु अर्को सफलता हो । नेपाललाई शानदार ढंगले विश्व कपमा पुर्‍याउने खेल क्रिकेट बनेको छ । पूर्वाधार निर्माण र क्रिकेटको व्यावसायिकताका लागि सरकार र निजी क्षेत्रको प्रयास जरुरी छ ।