जोमसोम ।
मुस्ताङको घरपझोङ गाउँपालिकाका ५ वटै वडा जोड्ने घरपझोङ रिङरोड सडकको कालोपत्र एक महिना नपुग्दै उप्किएको छ । रिङरोड सडक अन्तर्गत जोमसोम ठिनी ३ किमीमा कात्तिकमा कालोपत्र भएको थियो ।

गण्डकी प्रदेश सरकार अन्तर्गत मुस्ताङको जोमसोम, ठिनी, ढुम्बाताल, सम्ले छैरो, चिमाङ लगायतका गाउँहरु जोड्ने ‘एक निर्वाचन क्षेत्र, एक सडक’ मा यो योजना बेको हो । २०७६ कात्तिक २१ गते वन्दना भगवती जेभी कन्ट्रक्सनले २१ करोड ४३ लाख १३ हजारमा यसको ठेक्का पाएको थियो । सम्झौता अनुसार सडक २०७७ माघ महिनामा सकिनुपर्ने थियो । तर, निर्माण कम्पनीको चरम बेवास्ताले ५ पटकसम्म म्याद थप हुँदा पनि काम सकिएको छैन ।

गण्डकी सरकारले घरपझोङ गाउँपालिकाका पर्यटकीय गाउँ ठिनी हुँदै ढुम्बाताल, ढुम्बा गाउँ, छैरो र चिमाङ जोड्ने साढे १० किमी सडक बनाउन लागेको हो । वन्दना भगवतीले सडकको जोमसोमदेखि ढुम्बातालसम्म ड्रेनसहित ८ मिटर चौडा सडकमा ५ किमी प्रिमिक्स कालोपत्र र बाँकी ५ दशमलव ५ किमी ग्राभेल गर्ने सम्झौतामा उल्लेख छ ।

जीर्ण आयोजना अन्तर्गत एक वर्ष म्याद थप पाएको रिङरोड सडक अन्तर्गत जोमसोम ठिनी ३ किमी कम्पनीले जसोतसो कालोपत्र गरेको छ । तर, कालोपत्र कमसल खालको हुँदा ठाउँ ठाउँमा उप्किएको छ । स्थानीयले ठेकेदारले कमसल काम गरेको र अनुगमन गर्ने कार्यालयले उपयुक्त ढंगले निगरानी नगरेको गुनासो गरेका छन् ।

पूर्वाधार विकास कार्यालयका सूचना अधिकारी इन्जिनीयर घनश्याम रोक्कामगरले कालोपत्र सडकमा केही समस्या आएको देखिएमा निर्माण कम्पनीले पुन कालापत्र गर्ने शर्त रहेको जानकारी दिए । ‘ठेकेदारले अनुकूल समयमा काम गरेन, ढिलो काम थाल्यो,’ रोक्कामगरले भने, ‘काम गर्छु भनेपछि नगर भन्न सकिएन, ठिनी गाउँसम्म जसोतसो कालोपत्र गरौ न भनेर गर्न दियौं, चिसोका कारण कालोपत्र बिग्रिएको हुन सक्छ ।’

उनले घरपझोङ रिङरोड सडकको भौतिक प्रगति ७६ प्रतिशत भएको जानकारी दिए । रिङरोड सडकका लागि बजेट कम भएकाले सडक निर्माणको काममा ढिलासुस्ती भएको रोक्कामगरले जनाए ।

पछिल्लो समय सार्वजनिक खरिद नियमावलीको १३ औ संशोधन आएपछि रिङरोड सडकको म्याद १ वर्ष थपिएको छ । मुस्ताङको घरपझोङ रिङरोड सडकमा अझै सडकको स्टक्चर, ड्रेन निर्माण र सडक फिनिसिङका काम बाँकी छन् । रिङरोड बनेपछि घरपझोङका ठिनी, ढुम्बा, सम्ले, छैरो र चिमाङ गाउँका कृषि उपज बजारीकरणमा सहज हुनेछ ।