पाेखरा । पूर्व प्रधानमन्त्री एव‌ नेपाल समाजवादी पार्टी (नेसपा) का अध्यक्ष डा. बाबुराम भट्टराईले कास्की प्रहरीको हिरासतमा रहेका रास्वपा सभापति रवि लामिछानेसँग शुक्रबार बिहान भेट गरेका छन् ।

रविलाई भेटेर बाहिरिएपछि भट्टराईले राज्य पक्षले एकपछि अर्को ढंगमा रविमाथि दुख दिने काम गरेरहेको बताए । राज्यबाट अस्वभाविक र अन्यायपूर्ण काम भएको भन्दै उनले रास्वपाको आन्दोलनमा ऐक्यबद्धता पनि जनाए ।

उनले भने, ‘जुन राजनीतिक शक्तिहरू उदय भइराखेको छ, तीमध्येको एउटा सशक्त धार गठन गर्ने व्यक्तिको रुपमा म उहाँलाई बुझ्छु । त्यसैले उहाँप्रति मेरो सधैं सद्भाव पनि छ,’ भट्टराईले भने, ‘अहिले उहाँलाई विभिन्न ढंगले एकपछि अर्को गरेर दुःख दिने काम भइरहेको छ, यो अस्वभाविक र अन्यायपूर्ण भयो भनेर आफ्नो ऐक्यवद्धता दिन म यहाँ आएको हो । यो अलिकति प्रतिशोधपूर्ण भएको छ भन्ने मलाई लागेको छ ।’

कात्तिक २ गते काठमाडौंमा पक्राउ गरी लामिछानेलाई पोखरा ल्याएर हिरासतमा राखिएको छ । उनीमाथि पोखराको सूर्यदर्शन सहकारीको रकम गोर्खा मिडियामार्फत् अपचलन गरेको आरोप छ । यसबीचमा उनलाई बयानका लागि बुटवल, काठमाडौं र चितवन लगेर बयान लिइसकिएको छ ।