लेखनाथ । कास्कीको लेखनाथमा जारी २५औं आदर्श कप फुटबल प्रतियोगिताको दोस्रो दिन भएको खेलमा सशस्त्र प्रहरी बल गण्डकी मुख्यालय सेमिफाइनलमा प्रवेश गरेको छ ।

आदर्श युवा क्लबको आयोजनामा भएको प्रतियोगितामा सहभागी आठ टिममध्ये आइतबार भएको खेलमा नेपाल आर्मी, सिद्धिदल गण पश्चिम पृतनाको टिमलाई सशस्त्र प्रहरी बल गण्डकी मुख्यालय (एपीएफ)ले ३–१ ले पराजित गरेको हो ।
खेलको २५ औं मिनेटमा सशस्त्रका नवराज मगरले पहिलो गोल गरेका थिए । खेलको दोस्रो हाफमा सशस्त्रको तर्फबाट ६५ औं मिनेटमा रन्जित चौधरीले दोस्रो गोल गरी आफनो टिमलाई थप बलियो बनाउन सफल भएका थिए । सशस्त्रबाट तेस्रो गोल प्रविन स्याङतानले ७० औं मिनेटमा गरेका थिए ।

नेपाल आर्मीको तर्फबाट मदन लिम्बुले अतिरिक्त समयमा सान्त्वना गोल फर्काउन सफल भएका थिए । आइतबारको खेलको म्यान अफ दी म्याचको उपाधि सशस्त्रका प्रविन स्याङतानले प्राप्त गरेका छन् । उनले टफीसहित नगद ५ हजार रुपैयाँ पुरस्कार पाएका छन् ।

दोस्रो दिन गण्डकी प्रदेशका पूर्व सासंद दीपक कोइरालाले खेलकुदको विकासका लागि लेखनाथ खेल मैदानलाई पोखराकै वैकल्पिक रंगशाला बनाउनुपर्नेमा जोड दिएका थिए । प्रतियोगिताको विजेतालाई नगद ४ लाख २५ हजार पाँच सय २५ रुपैयाँ र उपविजेतालाई २ लाख २५ हजार पाँचसय २५ रुपैया सिल्ड, मेड र प्रमाणपत्र प्रदान गरिने छ ।