पोखरा ।
नेपाल पत्रकार महासंघको गण्डकी प्रदेश समितिको नयाँ नेतृत्वका लागि सोमबार उम्मेदवारी दर्ता भएको छ । महासंघको निर्वाचन २८ गते हुँदैछ ।

७ पदाधिकारी १४ सदस्य गरी २१ जनाका लागि हुने निर्वाचनमा ३५ जनाको उम्मेदवारी परेको छ । अध्यक्षमा प्रेस युनियन र प्रेस चौतारीको समीकरण अनुसार युनियनका रमेश पौडेल र प्रेस सेन्टरसहित विभिन्न संगठनबाट गोविन्द सुवेदीले मनोनयन दर्ता गरेका छन् । सुवेदी यसअघि महासंघ गण्डकीको महासचिव थिए ।

उपाध्यक्ष खुलातर्फ चौतारीका प्रकाश पौडेल र सेन्टरका घनश्याम पाण्डेसहित युनियनका यदुनाथ बन्जाराको उम्मेदवारी परेको छ । युनियनका बन्जाराले चौतारीसँग समीकरण गरेको युनियनको सिफारिसमा उम्मेदवार बनेका होइनन् । महिला उपाध्यक्षमा कमला खत्री केसी र मायाकुमारी अधिकारीको उम्मेदवारी परेको छ । महासचिवमा जमुना वर्षा शर्मा र दीपक परियारको उम्मेदवारी परेको छ । शर्मा चौतारी र परियार सेन्टर आवद्ध पत्रकार हुन् ।

सचिव खुल्लातर्फ ताराप्रसाद शर्मा र भविश्वर पाण्डे, सचिव समावेशीतर्फ रामबहादुर घले परियार र रोशनी गुरुङको मनोनयन दर्ता भएको छ । कोषाध्यक्षतर्फ अग्निधर लुइँटेल, रमेश बस्ताकोटी र सागरराज तिमिल्सिनाको उम्मेदवारी दर्ता भएको निर्वाचन समितिले जनाएको छ । लुइँटेल प्रेस सेन्टर र बस्ताकोटी युनियनका हुन् । तिमिल्सिनाले स्वतन्त्र उम्मेदवारी दिएका हुन् ।

खुला सदस्यतर्फ श्रीकृष्ण सिग्देल, गणेश पहारी, छविलाल पाण्डे, जनक श्रेष्ठ, ध्रुवराज सुवेदी, विजय नेपाल, राजेश पराजुली, रोशन लामिछाने र शेखर थापाको उम्मेदवारी परेको छ । महिला सदस्यतर्फ ज्योति हमाल, रञ्जिता शर्मा, लक्ष्मी सुनार र सपना अधिकारीले मनोनयन दर्ता गरेका छन् । सदस्य (दलित) तर्फ अमितकुमार विश्वकर्मा र विजय नेपाली उम्मेदवार बनेका छन् ।

सदस्य (आदिवासी जनजाति) तर्फ तिलप्रसाद पुन (तिलक पुन), पदम श्रेष्ठ र मञ्जुल शाक्यको उम्मेदवारी परेको छ । सदस्य (अल्पसंख्यक) तर्फ सुन्दरकुमार थकालीको मात्र उम्मेदवारी परेको छ । समाधान दैनिकका मुस्ताङ संवाददाता थकाली निर्विरोध भएका छन् । तर निर्वाचन समितिले आधिकारिक घोषणा गर्न बाँकी छ ।