पोखरा । कास्कीको मादी गाउँपालिका वडा नं. ७ का दुई जनालाई भरुवा बन्दुकसहित पक्राउ गरिएको छ । सोमबार दिउँसो कास्की प्रहरीले मादी ७ मेलवोट बस्ने वर्ष ३२ का कुलप्रसाद विक र मादी ७ को पानीघाट बस्ने वर्ष २२ का सुमन तामाङलाई पक्राउ गरेको हो ।

उनीहरुलाई नियन्त्रणमा लिई कास्की जिल्ला अदालतबाट हातहतियार तथा खरखजनासम्बन्धी मुद्दामा ६ म्याद थप गरी अनुसन्धान जारी रहेको कास्कीका प्रहरी प्रवक्ता वसन्तकुमार शर्माले जानकारी दिए । सोमबार दिउँसो मादी ७ मेलबोट, लिचु भन्ने जंगल नजिकै रहेको गाईगोठमा भरुवा बन्दुक चेकजाँच गर्ने क्रममा एक्कासी पड्किदा विनोद सुनार घाइते भएका थिए ।

सुनारलाई उपचारका लागि पोखरा स्वास्थ्य विज्ञान प्रतिष्ठान ल्याएको भन्ने सूचना प्ताप्त हुनासाथ वडा प्रहरी कार्यालय रामबजारबाट खटिएको प्रहरीले कुलप्रसाद विकको गाईगोठ नजिकै भरुवा बन्दुक फेला पारेको थियो ।