पोखरा । लेकसिटी कलेज एन्ड रिसर्च सेन्टर पोखराले शनिबार कार्निभल आयोजना गरेको छ ।

पोखरा ४ गैह्रापाटनमा रहेको कलेज परिसरमा तेस्रो लेकसिटी कार्निभल भएको हो ।

कलेज सञ्चालक समिति अध्यक्ष प्राडा विश्वकल्याण पराजुलीले कार्निभल सुरुआत गरे । कलेज परिसरको खेल मैदानमा सांस्कृतिक कार्यक्रमका लागि मुख्य मञ्चसहित ११ स्टलहरु राखिएका थिए । ती स्टलमा स्थानीय उत्पादन मह, अचार, सातु, कपडाका झोला, हस्तकला, सजावट, सौन्दर्य सामग्री लगायतको प्रदर्शनी र बिक्री गरिएको छ ।

खानाका परिकारहरु सेलरोटी, तरकारी, अचार, मम, चाउमिन पानीपुरी, चटपट पनि राखिएका थिए । कलेजमा अध्ययन गरिरहेका र पूर्वविधार्थी आफैंले ती स्टलको व्यवस्थापन गरेको क्याम्पस प्रमुख प्रमुख नारायणकुमार श्रेष्ठले जानकारी दिए । टेलिकम कम्पनी एनसेलले सेवा, सुविधाबारे कार्निभलमा स्टल राखेर सहभागीलाई जानकारी दिएको थियो । एनसेलले कलेजमा अध्ययनरत विद्यार्थी र प्राध्यापकहरुलाई निशुल्क सिम वितरणसमेत गरेको छ ।

कार्निभललाई थप मनोरञ्जनात्मब बनाउन विद्यार्थीले सांस्कृतिक कार्यक्रम प्रदर्शन गरे ।

गायन, नृत्य, लाखेनाच सहितका सांगीतिक र सांस्कृतिक कार्यक्रमले कलेजको खुला मैदानमा जम्मा भएका सबैलाई मोहित पारेको थियो ।

कलेजकी पूर्वविधार्थी सपना गायकले कार्यक्रम सञ्चालन गरेकी थिइन् । साँझ आयोजित कन्सर्टमा कर्खा र अपरिमित ब्यान्डको सांगीतिक प्रस्तुति थियो । कार्निभललाई विजय आभूषण र रोजिना अफसेट प्रेसले प्रायोजना तथा लिचीबोट पार्टी प्यालेस, लोटस युनिफर्म र हलमार्कले सहयोग गरेका थिए ।

आगामी वर्ष पनि यस प्रकारको कार्यक्रमलाई निरन्तरता दिइने सहायक क्याम्पस प्रमुख शोभाकान्त सिग्देलले बताए । लेकसिटीले सामाजिक विज्ञान केन्द्रको मौलिक प्रस्तुतिका रुपमा हरेका महिना कचहरी कार्यक्रम गर्दै आएको छ ।

त्रिविबाट सम्बन्धन प्राप्त यो कलेज २०६४ मा स्थापना गरिएको हो । कलेजमा स्नातक तहअन्तर्गत बिबिएस, बिएएसडब्लु (समाजसेवा) र बिएमा समाजशास्त्र, पत्रकारिता तथा आमसञ्चार र अंग्रेजी साहित्य पठनपाठन हुन्छ । हाल कलेजमा ३ सय ५० विद्यार्थी छन् ।