पोखरा ।

सहकारी ठगी संगठित अपराध र मनिलउन्डरिङ केसमा कास्की जिल्ला अदालतमा मुद्दा दर्ता भएका राष्ट्रिय स्वतन्त्र पार्टीका सभापति रवि लामिछानेको हिरासत बसाई अझै लम्बिने संकेत मिलेको छ । उनी कास्की प्रहरीको हिरासतमा छन् । जिल्ला अदालत कास्कीमा पेश भएका लामिछानेलाई आईतबार कार्यालय समय सकिए पछि पुन कास्की प्रहरी कै हिरासतमा फर्काइएको छ ।

आज आइतबार सरकारी वकिलको कार्यालयले उनी माथिको मुद्दा अदालतमा दर्ता गरेका छन् । तर थुनछेक बहस सुरु भएको छैन ।

कास्की अदालतले प्रहरीलाई शुक्रबारसम्म मात्र हिरासतमा राखेर अनुसन्धान गर्न म्याद दिएको थियो । त्यो म्याद शुक्रबार राति १२ बजे सकिए पनि शनिबार बिदा भएका कारण आइतबार विहानै प्रहरीले उनलाई अदालतमा हाजिर गरायो ।

यसअघि अदालतमा उपस्थित गराउदा प्रहरीले सरकारी वकिल मार्फत हिरासतमा राख्ने दिन थप्न आग्रह गर्दथ्यो । तर आइतबार मुद्दा नै दर्ता भएपछि यसो गर्नु परेन । तर थुनछेक बहस नसकिन्जेलसम्म लामिछाने कास्की प्रहरी कै न्यायिक हिरासतमा रहनेछन् ।

आइतबार मुद्दा दर्ताको काम सकिएकाले सोमबार मात्र रविको मुद्दा गोला प्रथामा जानेछ र न्यायाधिशको बेन्च तय हुनेछ । त्यसपछि दुवै पक्षको बहस प्रति बहस र आदेश नहुन्जेलसम्म रवि कास्की प्रहरीको हिरासत मै रहने छन ।

रविसँगै आज पेश गरिएका छविलाल जोशीसहितका पाँचै जनालाई पुन कास्की प्रहरीको हिरासतमै राखिएको छ ।