पोखरा
पोखराको बलिदानी बचत तथा ऋण सहकारी संस्थामा जम्मा रहेको रकम अपचलनमा संलग्न एकजनालाई कास्की प्रहरीले पक्राउ गरेको छ । सहकारीका ऋण उपसमिति सदस्य तथा लोन अधिकृत २७ वर्षीय नवीन भण्डारी पक्राउ परेका हुन् ।

स्याङ्जा जिल्लाको हरिनास गाउँपालिका–३ स्थायी घर भई हाल पोखरा–८ आलुमाइलाचोक बस्ने भण्डारीलाई सोमबार पोखरा–९ पृथ्वीचोकबाट पक्राउ गरिएको कास्की प्रहरीका सूचना अधिकारी एवं डिएसपी वसन्तकुमार शर्माले बताए ।

भण्डारी सहकारी ऐन, नियमावाली तथा संस्थाको नियम विपरीत रकम हिनामिना एवं अपचलन गरी ठगी गरेको कसुरमा संलग्न रही फरार रहेका बेला पक्राउ गरिएको प्रहरीले जनाएको छ । भण्डारीलाई मंगलबार कास्की जिल्ला अदालतमा मुद्दाको अभियोगपत्र माग दावी अनुसार सजायको लागि उपस्थित गराइएको शर्माले जनाए ।