पोखरा । राष्ट्रिय स्वतन्त्र पार्टीका सभापति रवि लामिछानेसँग जिल्ला अदालत कास्कीमा बयान सुरु भएको छ ।

न्यायाधीश नितिज राईको इजलाशमा उनको बयान सुरु भएको हो । सहकारीको रकम अपचलनको आरोपमा पक्राउ परेका उनीविरुद्ध सम्पत्ति शुद्धीकरण लगायतमा जिल्ला अदालत कास्कीमा मुद्दा दायर भएको छ ।

उनका व्यावसायिक साझेदार छविलाल जोशी र अर्की आरोपित लीला पछाईंसँगको बयान सकिएपछि बिहीबार रविको बयान सुरु भएको हो ।

पूर्वगृहमन्त्री एवं राष्ट्रिय स्वतन्त्र पार्टी (रास्वपा) सभापति रवि लामिछानेविरुद्ध पुस ७ मा जिल्ला अदालत कास्कीमा मुद्दा दर्ता भएको हो ।

लामिछानेविरुद्ध सहकारी ठगी, संगठित अपराध र सम्पत्ति शुद्धीकरण अभियोगमा पूरक अभियोगपत्र दायर भएको हो ।

रविविरुद्ध फरकफरक कसुरमा सजाय माग गर्दै अभियोगपत्र दर्ता भएको छ । लामिछानेसहित व्यक्ति र संस्था गरी ४४ जनाविरुद्ध पूरक अभियोग आइतबार दर्ता भएको हो ।

लामिछानेमाथि दायर भएको सहकारी ठगीसम्बन्धी अभियोगमा विभिन्न व्यक्तिको खातामा रकम परिचालन गरी ठगी गरेको आरोप छ । अभियोगपत्र अनुसार रविले सहकारीबाट ३ करोड ३७ लाख रुपैयाँ ठगेका छन् ।