पोखरा । सामाजिक सुरक्षा कोषले कोषमा आबद्ध भएका योगदानकर्ताका छोराछोरीलाई पनि उपचार सुविधा दिने तयारी गरेको छ ।

यस अघि स्वयम योगदानकर्ता र योगदानकर्ताको श्रीमान् तथा श्रीमतीलाई समेत उपचार सुविधा दिइरहेको कोषले अब योगदानकर्ताका छोराछोरीलाई पनि उपचार सुविधा दिने तयारी गरेको हो ।

त्यसैलाई कार्यान्वयन गर्ने चरणमा कोषले योगदानकर्तालाई सन्ततिको विवरण अद्यावधिक गर्नका लागि आग्रह गरेको छ । कोषले एक सूचना जारी गर्दै औपचारिक क्षेत्रका योगदानकर्ताको दम्पती र १८ वर्षसम्मका छोराछोरीमा समेत विस्तार भई कार्यान्वयनको चरणमा रहेको भन्दै सन्ततिको विवरण अद्यावधिक गर्न आग्रह गरेको हो ।

उक्त सुविधाकाको दाबी भुक्तानीका लागि केवाईसी अद्यावधिक अनिवार्य हुनुपर्ने व्यवस्था रहेको भन्दै विभिन्न क्षेत्रबाट कोषमा योगदान गर्ने योगदानकर्ता, तिनका दम्पती र १८ वर्षसम्मको छोराछोरीको फोटोसहितको व्यक्तिगत विवरण अनिवार्य रूपमा अद्यावधिक गर्नु अनुरोध गरिएको कोषका उप कार्यकारी निर्देशक कृष्ण अधिकारीले जानकारी दिएका छन् ।

कोषले अनौपचारिक, स्वरोजगार र वैदेशिक रोजगारमार्फत योगदान गर्ने योगदानकर्ताले पाउने स्वास्थ्य उपचार सम्बन्धी सुविधा दम्पती र १८ वर्षसम्मको छोराछोरीमा समेत विस्तार यस अघि नै गरिसकेको छ ।