पोखरा । गण्डकी प्रदेशको राजधानी पोखरामा पर्यटकको लर्काे लागेको देखेर गण्डकी प्रदेशकै पर्यटन क्षेत्रमा यसले सकारात्मक सन्देश दिएको छ । यसले गर्दा होटल तथा रेस्टुरेन्टमा गरेको लगानीले सार्थकता पाउने देखिएको छ । पर्यटनको राजधानी पोखरासँगै गण्डकी प्रदेशमा पर्यटकको सेवा, सुविधाका लागि ठूला ठूला लगानी भइरहेका छन् ।

केन्द्रीय तथ्यांक कार्यालयले बुधबार सार्वजनिक गरेको ‘राष्ट्रिय होटल तथा रेस्टुरेन्ट सर्वेक्षण २०८०’ अनुुसार गण्डकी प्रदेशमा यो क्षेत्रमा गण्डकीमा १ खर्ब ६ अर्ब ६४ करोड लागनी भएको छ । यो लगानीसँगै गण्डकी १६ हजार ९ सय ७६ होटल रेस्टुरेन्ट बनेका छन् ।

सर्वेक्षणका अनुसार नेपालभर आतिथ्य सत्कार उद्योगको स्थायी सम्पत्ति ५ खर्ब ४३ अर्ब रुपैयाँ बराबर पुगेको छ । सबैभन्दा धेरै बागमती प्रदेशमा २ खर्ब ४१ अर्ब २९ करोड ९६ लाख ५ हजार बराबर छ । त्यसपछि गण्डकीमा १ खर्ब ६ अर्ब ६४ करोड, कोसी ८५ अर्ब ६९ करोड, लुम्बिनी ५१ अर्ब ३६ करोड, सुदूरपश्चिम २२ अर्ब ९९ करोड, मधेश २२ अर्ब २३ करोड र कर्णाली प्रदेशमा ११ अर्ब १ करोड बराबर छ ।

मुलुकको कुल गार्हस्थ उत्पादन (जिडिपी)मा होटल तथा रेस्टुरेन्ट उद्योगको योगदान १.९६ प्रतिशत पुगेको छ । हाल सञ्चालनमा रहेका होटल तथा रेस्टुरेन्टमध्ये कोसी प्रदेशमा २५ हजार ८ सय ८७, मधेस ११ हजार ७ सय ४०, बागमती ५२ हजार १ सय २३, गण्डकी १६ हजार ९ सय ७६, लुम्बिनी २० हजार १ सय ५६, कर्णाली ७ हजार १ सय १० र सुदूरपश्चिम प्रदेशमा ८ हजार २ सय २८ छन् ।