पोखरा । पश्चिमाञ्चल अटोमोबाइल डिलर्स एसोसिएसन (वाडा) पोखराको अध्यक्षमा दीपेन्द्र कोइराला निर्वाचित भएका छन् । शुक्रबार पोखरामा सम्पन्न अधिवेशनले उनको नेतृत्वमा सर्वसम्मत नयाँ कार्यसमिति चयन गरेको हो ।

एसोसिएसनको वरिष्ठ उपाध्यक्षमा शिव श्रेष्ठ, उपाध्यक्षमा निरन केसी, महासचिवमा विनय थापा, कोषाध्यक्षमा अशोक चालिसे र सचिवमा दीपेन्द्र भण्डारी निर्वाचित भएका छन् । त्यस्तै कार्यसमिति सदस्यमा छबिलाल सुवेदी, सन्ध्या पौडेल, नीरज बाटाजू, सौरभ थापा, अशोक चौधरी, शिवओम बराल, अम्बिका मोहन भट्टराई, बालकृष्ण कोइराला र प्रतीक सुवेदी निर्वाचित भएको निर्वाचन संयोजक तथा वाडाका पूर्व अध्यक्ष मोहनबाबु खड्काले जानकारी दिए । निवर्तमान अध्यक्ष कृष्णप्रसाद श्रेष्ठ पदेन सदस्य रहने छन् ।

नवनिर्वाचित अध्यक्ष कोइरालाले देवेन्द्र नकर्मी, नरेश सुवेदी र छबिलाल गौतमलाई कार्यसमिति सदस्यमा मनोनीत गरेका छन् ।

कार्यक्रममा बोल्दै गण्डकी प्रदेशका सामाजिक विकास, युवा तथा खेलकुद मन्त्री विन्दुकुमार थापाले अटोमोबाइल क्षेत्रमा एसोसिएसनको योगदान महत्वपूर्ण रहेको बताए ।

कार्यक्रममा नाडाका वरिष्ठ उपाध्यक्ष आकाश गोल्छा, नाडाका निवर्तमान अध्यक्ष ध्रुव थापा लगायतले अटोमोबाइल व्यवसायको समसामयिक विषयमा धारणा राखेका थिए ।

कार्यक्रममा बोल्दै नवनिर्वाचित अध्यक्ष कोइरालाले अटोमोबाइल व्यवसायीहरूको हकहितका क्षेत्रमा सक्रियताका साथ काम गर्ने प्रतिबद्धता व्यक्त गरेका छन् । आगामी फागुनमा पोखरामा अटो सो आयोजना गरिने बताउँदै उनले अटो सो सफल बनाउन सबैलाई आग्रह गरे ।

साधारणसभाको अवसरमा अग्रज व्यवसायी विश्वबन्धु थापा सम्मानित भएका छन् । पूर्व अध्यक्ष माधव पौडेल संयोजक रहेको समितिले थापालाई सम्मान गर्न सिफारिस गरेको थियो । प्रदेशका उत्कृष्ट ३ जना ट्राफिकलाई पनि सम्मान गरिएको छ ।