पोखरा। नेपाल पत्रकार महासंघका विभिन्न पदमा विजयी नेपाल प्रेस युनियनका सदस्यलाई नेपाल निजामती कर्मचारी युनियन कास्कीले स्वागत तथा बधाई ज्ञापन गरेको छ । गत मंसिर २८ गते भएको महासंघको अधिवेसनमा प्रेस युनियन कास्कीबाट गण्डकी प्रदेश र जिल्लाको विभिन्न पदमा निर्वाचित टिमलाई युनियन कास्कीले बधाई तथा शुभकामना दिएको हो ।

कार्यक्रममा अध्यक्ष सुरेशकुमार श्रेष्ठ, कर्मचारी युनियन गण्डकी उपाध्यक्ष निर्मल गुरुङ लगायतले खादामालाले बधाई ज्ञापन गरेका हुन् । कार्यक्रममा नेपाल पत्रकार महासंघ गण्डकीका अध्यक्ष रमेश पौडेलले कर्मचारी युनियन र प्रेस युनियन पदले भन्दा पनि विचारले एक भएको बताए । विचारलाई एक ठाउँमा राखेर आगामी दिनमा नयाँ कार्यक्रमका साथ अघि बढ्नुपर्ने उनको भनाइ छ ।

नेपाल निजामती कर्मचारी युनियन कास्की अध्यक्ष सुरेशकुमार श्रेष्ठले पत्रकार र कर्मचारीको सुमधुर सम्बन्ध हुनुपर्नेमा जोड दिए । सोही क्रममा उनले कर्मचारी युनियनको आसन्न अधिवेसनको तयारीका लागि सम्पूर्ण साधारण सदस्यले तयारी थाल्नुपर्ने बताए । नयाँ सदस्य दिन छुटेकाहरुलाई युनियनमा आबद्ध हुन पनि उनको आग्रह थियो ।

युनियन कास्की उपाध्यक्ष केदार सापकोटाले प्रजातान्त्रिक विचार बोकेको सरकारले बनेको स्थानीय, प्रदेश र केन्द्रीय सरकारको राम्रो कामको प्रचार र नराम्रा कामका खबरदारीमा पत्रकारको कलम र क्यामेरा चल्नुपर्नेमा जोड दिए ।