पोखरा । गण्डकी प्रदेश सरकारले २ सचिवको पदस्थापनसँगै सरुवा समेत गरेको छ । लामो समयदेखि निमित्तको भरमा चलेको आर्थिक मामिला मन्त्रालयमा सामाजिक विकास, युवा तथा खेलकुद मन्त्रालयका राजेन्द्रदेव पाण्डेलाई सरुवा गरिएको छ ।

आर्थिकका सचिव पुरुषोत्तम शर्माको असोजमा सरुवा भएदेखि १० औं तहका अधिकृत डिल्लीराज रिज्यालले निमित्तको जिम्मा पाएका छन् । त्यसयता २ सचिव प्रदेमा आए पनि अर्थमा नपठाइ मुख्यमन्त्री तथा मन्त्रिपरिषदको कार्यालय र सामाजिक विकास मन्त्रालयमा पठाइएको थियो । आर्थिक मामिला मन्त्रालयमा संघीय दरबन्दीका राजश्वतर्फका उपसचिव पनि हुन्छन् । १० औं तहका अधिकृतलाई निमित्तको जिम्मेवारी दिएपछि आन्तरिक रुपमा असन्तुष्टि चुलिएको थियो । जसका कारण मन्त्रालयको कार्यसम्पादन नै प्रभावित भएको त्यहिँ कार्यरत कर्मचारीहरु बताउँछन् ।

राजनीतिक नेतृत्वको दबाब र चाहाना अनुसार सचिवहरु काम गर्न तयार नहुने गरेका दृष्टान्त यसअघि नै देखिँदै आएका छन् । सचिवहरु बलराम रिज्याल र पुरुषोत्तम शर्मा सरकार ‘अनुकुल’ हुन नसकेकै कारण १ वर्ष पनि नबसी संघमै फर्किएका हुन् । ठूलो मात्रामा रकमान्तर गर्नुपर्ने, योजनामा रकम थप्नुपर्ने साथै बजेटमै नभएका योजनाका लागि समेत रकम छुट्याउनुपर्ने दबाब आर्थिक मामिला मन्त्रालयका सचिवमाथि पर्ने गरेको छ ।

पुस ५ गते संघ सरकारको निर्णय अनुसार सरुवा भइ आएका २ सचिवमध्ये राजश्वका क्याडर टंकप्रसाद पाण्डेले आर्थिक मामिला मन्त्रालयको जिम्मेवारी पाउने अनुमान गरिएको थियो । तर उनलाई प्रदेशकै योजना आयोगमा पठाएर सरकारले सामाजिकका राजेन्द्रदेव पाण्डेलाई आर्थिक मामिलामा पठाइएको छ ।

टंकप्रसादसँगै सरुवा भएर आएका नवराज ढकाललाई सामाजिक विकास मन्त्रालयको जिम्मेवारी दिइएको छ । पहिला संघबाटै मन्त्रालय तोकेर तोकेर पठाइने गरेकामा अहिले प्रदेश आएका सचिवलाई प्रदेशको मन्त्रिपरिषदले मन्त्रालय वा निकायमा खटाउने गरिएको छ ।

सरुवा भएका उपसचिवले ५ महिनासम्म रमाना लिएनन्
लामो समय सचिव रिक्त रहेको आर्थिक मामिला मन्त्रालयमा प्रशासनतर्फ उपसचिवको एउटा दरबन्दी छ । एउटा दरबन्दी रहेको ठाउँमा ५ महिनादेखि २ जना कार्यरत छन् । मुख्यमन्त्री तथा मन्त्रिपरिषदको कार्यालयले साउन अन्तिममा कर्मचारीको सरुवा गरेको थियो । आर्थिक मामिला मन्त्रालयका उपसचिव श्रीप्रसाद अधिकारीको उतिबेलै प्रदेशकै स्वास्थ्य मन्त्रालयमा सरुवा भए पनि अहिलेसम्म गएका छैनन् ।

सरुवा भएको २१ दिनभित्र रमाना बुझ्नुपर्नेमा उनले आर्थिक मामिला मन्त्रालयबाटै तलब खाइरहेका छन् । उनको सरुवा बदर पनि भएको छैन । बरु उनकै ठाउँमा प्रशासनकै उपसचिव डिल्लिराम रिज्याल गएका थिए । उनै रिज्याल अहिलेसम्म निमित्त सचिव छन् । सरकारका प्रवक्तासमेत रहेका आर्थिक मामिला मन्त्री डा. टकराज गुरुङ व्यावहारिक समस्याका कारण उपसचिव अधिकारी सरुवा भएको कार्यालयमा जान नसकेको बताए । उनले भने, ‘केही व्याहारिक समस्या रैछ, अब १/२ दिनमै उपसचिव अधिकारीको रमाना हुन्छ ।’