लेखनाथ । कास्कीको लेखनाथमा जारी २०औँ लेखनाथ महोत्सवमा एकै स्थानमा सयभन्दा बढी प्रजातिका माछाको अवलोकन गर्न सकिन्छ । महोत्सवमा पहिलो पटक राखिएको रंगीबिरंगी माछाले भरिएको एक्वारियमले दर्शकहरूको ध्यान तानिरहेको छ । समुद्रमुनिको अनुभूति दिनेगरी सजाइएको एक्वारियममा दर्शक तथा विद्यार्थीहरू फोटो खिचाउन उत्साहित छन् ।

लेखनाथ उद्योग वाणिज्य संघका कोषाध्यक्ष तथा अर्थ तथा वित्त व्यवस्थापन समितिका संयोजक धु्रवबाबु भट्टराईका अनुसार, एक्वारियम महोत्सवको मुख्य आकर्षण बनेको छ । यसले माछासम्बन्धी अनुसन्धान र अध्ययनमा पनि टेवा पुर्‍याउने सम्भावना रहेको छ । माछाका लागि उपयुक्त वातावरण र पानीको गुणस्तर कायम गर्न आवश्यक व्यवस्थापनमा ठूलो लगानी र वातावरणीय सतर्कता आवश्यक पर्ने उनले बताए ।

यसैबीच, महोत्सवको छैटौँ दिन मंगलबार करिब १० हजार दर्शकले मेलाको अवलोकन गरेका छन् भने करिब ३० लाख रुपैयाँको आर्थिक कारोबार भएको प्रचारप्रसार उपसमितिका संयोजक जानुका अधिकारीले जानकारी दिइन् । हालसम्म ९६ हजारभन्दा बढी दर्शकले महोत्सव अवलोकन गरेका छन्, जसबाट ३ करोड रुपैयाँको कारोबार भएको छ ।

बुधबार लोकदोहोरी कार्यक्रममा बद्री पंगेनी, टीका सानु, प्रेमराज अधिकारी, रिया खड्का, रतिमाया खड्का, सन्तोष सुवेदी तथा रातिको कन्सर्टमा रमेशराज भट्टराई र सिर्जना खत्रीले प्रस्तुति दिने कलाकार व्यवस्थापन समितिका संयोजक उपेन्द्रराज सुवेदी ‘राजु’ ले जानकारी दिए ।

‘महोत्सवको पनि महोत्सव’ का रूपमा चिनिएको लेखनाथ महोत्सवमा साहित्य, महिला विशेष, विद्यालयस्तरीय, सांस्कृतिक, आदिवासी, जनजाति विशेष कार्यक्रम, जैविक विविधता, कृषि तथा पशुपन्छी प्रदर्शनी, सूचना प्रविधि, शैक्षिक प्रदर्शनी, हस्तकला, र लोपोन्मुख रीतिरिवाज र संस्कृति झल्काउने नृत्य प्रदर्शन रहेका छन् ।

ख्यातिप्राप्त हास्यव्यंग्य कलाकारहरूको दैनिक प्रस्तुति, बाल उद्यान, खाना महोत्सव, राष्ट्रिय लोकदोहोरी गीत, र लाइभ म्युजिक कन्सर्ट महोत्सवका थप आकर्षण हुन् ।