पोखरा ।

रास्वपा सभापति रवि लामिछाने लगायत विरुद्ध परेको सहकारी ठगी, संगठित अपराध र सम्पत्ति शुद्धीकरण मुद्दामा कास्की जि्ला अदालतले केही बेरमा आदेश गर्ने भएको छ । बिहीबार सरकारी वकिलको कार्यालयका वकिलहरुले जवाफी बहस गरेपछि अब आदेश आउने भएको हो । यसअघि जाहेरवाला र प्रतिवादीहरुका तर्फबाट साता दिनभन्दा लामो बहस अदालतमा भएको थियो ।

लामिछानेसहित ४४ जनाविरुद्ध पुस ७ गते जिल्ला सरकारी वकिलको कार्यालयले मुद्दा दायर गरेको थियो । लामिछाने कात्तिक २ गते काठमाडौंमा पक्राउ परेका थिए । उनीहरुको मुद्दा न्यायाधीश नीतिज राईको इजलासमा छ । उनैले अब लामिछानेसहितका प्रतिवादी कोकोलाई थप अनुसन्धानका लागि कारागार पठाउने, कोकोलाई धरौटीमा रिहा गर्ने भन्ने आदेश गर्नेछन् ।
मुद्दा लागेकामध्ये १९ जनालाई संगठित अपराधको अभियोग छ । धेरैलाई भने सहकारी ठगीको अभियोग लागेको हो । अहिले कास्की अदालतमा कानुन व्यवसायी र प्रतिवादीहरुसमेतलाई कार्यालय भवनभित्र प्रवेश गर्न दिइएको छैन । रवि लामिछाने लगायतहरु भवन परिसरको प्रतीक्षा कक्षमा बसेर आदेश कुरिरहेका छन् ।

थुनछेक आदेश आउने भएपछि कास्की जिल्ला अदालत वरिपरि सुरक्षा व्यवस्था कडा बनाइएको छ।