पोखरा । यस वर्षको थमन महेश स्मृति पत्रकारिता पुस्कारबाट पत्रकार दीपक परियार पुरस्कृत हुने भएका छन् । प्रेस सेन्टर नेपाल जिल्ला समिति कास्कीको शनिबार पोखरामा हुने छैठौं अधिवेशनको अवसरमा उक्त पुरस्कार प्रदान गरिने भएको छ ।

कान्तिपुर राष्ट्रिय दैनिकमा आबद्ध परियार डेढ दशकदेखि पत्रकारितामा क्रियाशील छन् । उनलाई नगद २५ हजारसहित पुरस्कृत गरिने पे्रेस सेन्टर कास्की अध्यक्ष कृष्ण दवाडीले बताए । प्रेस सेन्टरका सल्लाहकार कोमलनाथ बरालको संयोजकत्वमा बनेको प्रतिभा छनोट समितिले दिएको सिफारिसको आधारमा प्रेस सेन्टर कास्कीले परियारलाई पुरस्कृत गर्ने निर्णय भएको हो ।

समितिमा अग्रज पत्रकार विश्वप्रकाश लामिछाने, पूर्व सम्मानित विभु भुषाल, पदेन सदस्यमा प्रेस सेन्टर कास्की अध्यक्ष कृष्ण दवाडी र सचिव पुष्प दाहाल छन् । प्रेस सेन्टर कास्कीको छैटौं अधिवेशनले ३ वर्षे कार्यकालका लागि नयाँ नेतृत्व समेत चयन गर्ने छ ।

जिल्ला अधिवेशनको तयारी पूरा भएको अध्यक्ष दवाडीले जनाए । अधिवेशनमा पूर्व उपप्रधान तथा गृहमन्त्रीसमेत रहेका नेकपा माओवादी (केन्द्र) का वरिष्ठ उपाध्यक्ष नारायणकाजी श्रेष्ठ उपस्थित हुने तय छ ।