पोखरा । नेपाल ललितकला प्रज्ञा–प्रतिष्ठानको आयोजना तथा सिर्जनशील कलाकार समूह पोखराको सहकार्यमा पोखरा आर्ट ग्यालरीमा सोमबार अन्तर्राष्ट्रिय कला प्रदर्शनी सुरु भएको छ ।    
    
 अमेरिकासहित विभिन्न देशका एक दर्जन कलाकार र नेपाली कलाकारले तयार पारेका दुई दर्जन बढी कला प्रदर्शनीमा राखिएका छन् । मंगलबार प्रदर्शनीमा पानी रङसहित विभिन्न रङका चित्र समावेश गरिएका छन् ।    
    
 प्रदर्शनीको उद्घाटन गर्दै पोखरा महानगरपालिकाका प्रमुख धनराज आचार्यले कला र संस्कृतिलाई पर्यटनसँग जोड्दै पोखरालाई कला क्षेत्रको गन्तव्यका रूपमा विकास गर्न आवश्यक भएको बताए ।  पोखरामा विसं २०२५ देखि ‘आर्ट ग्यालरी’ सञ्चालन गरी युवालाई कला क्षेत्रमा आकर्षण गर्दै आइएको बताउँदै उनले कलाक्षेत्रले स्थानीयस्तरदेखिका मौलिकतालाई चिनाउने उल्लेख गरे ।

    
    
 नेपालको कलालाई विदेशसम्म प्रचारप्रसार र प्रवर्द्धन गर्न यस्ता प्रदर्शनी फलदायी हुने नगरप्रमखु आचार्यले बताउँदै यो प्रदर्शनी विदेशी र नेपाली कलाकारका नयाँनयाँ कलाका बारेमा अनुभव साटासाट गर्ने अवसर बनेको धारणा राखे ।

    
 “कला सबैको हातबाट निस्कन सक्दैन, केही मानिसमा यस्ता किसिमका कला हुन्छन्, जो सबैले हेर्नु र जान्नु आवश्यक छ”, प्रमुख आचार्यले भने, “पछिल्लो समय कलाक्षेत्रबाट पनि आफ्नो जीविकोपार्जन गर्नसक्ने अवस्था सिर्जन भएको छ ।”    
    
   
 ललितकला प्रज्ञा–प्रतिष्ठान आधुनिक कला शाखाका संयोजक सौरगङ्गा दर्शनधारीको अध्यक्षतामा भएको उक्त कार्यक्रममा विदेशी कलाकारहरूले आ–आफ्नो भनाइ राखेका थिए ।  रासस