पोखरा ।
नेकपा (एमाले) जिल्ला कमिटी कास्कीले स्थानीय तहको वडा तहसम्म केन्द्रित गरी अभियान गर्ने तयारी गरेको छ । एमालेलाई निर्णायक शक्ति बनाउने केन्द्रीय कमिटीको माघदेखि चैतसम्मको ३ महिने अभियान अन्तर्गत स्थानीय तहसम्म पार्टीका गतिविधिलाई नियमित गर्ने जिल्ला कमिटी कास्कीका अध्यक्ष बैनबहादुर अधिकारी क्षत्रीले जानकारी दिए ।

उनले हरेक टोलमा पार्टी कमिटी गठन र विस्तार गरिने उल्लेख गरे । ३ महिने जरा केन्द्रित अभियान सञ्चालनका लागि तयारी गरेको उल्लेख गर्दै उनले जिल्ला कमिटी कास्कीले आगामी माघ १८, १९ र २० गते जिल्ला स्तरीय प्रशिक्षण कार्यक्रम गर्ने बताए । पार्टीको मुखपत्र घोषणाको ११ औं संस्करणको प्रकाशन गरेको जानकारी दिँदै उनले कार्यालयको भवन मर्मत तथा सभा हल निर्माणको काम भइरहेको उल्लेख गरे ।

उनले हरेक पालिकामा योगदानमा आधारित समाजिक सुरक्षा योजना कार्यान्वयनका लागि कार्यक्रम गर्ने जनाए । अध्यक्ष अधिकारीले अर्को बैठकसम्म कमिटी विस्तार र विभाग गठन गर्ने बताए ।

एमालेका केन्द्रीय सदस्य कृष्ण थापाले पार्टीलाई एकताबद्ध र कामलाई व्यवस्थित गर्ने जनाए । उनले पालिका कमिटीको बैठक बसी बाँकी वडा अधिवेशनलाई सम्मन्न गर्ने बताए । उनले मनोनयन, विभाग गठन गरेपछि माघको २० गतेसम्म सबै काम सम्पन्न गर्ने उल्लेख गरे ।

‘तीन महिने जरा केन्द्रित अभियानको खाका आएपछि कार्यान्वयन गरिने छ,’ उनले भने, ‘वडा कमिटीको नियमित गतिविधि गरी टोल कमिटी गठन गर्ने योजना छ ।’ उनले संगठन सुदृढीकरणका लागि भेला, प्रशिक्षण गर्ने जनाए । उनले वित्तीय संघीयता कार्यान्वयनका लागि संघ तथा प्रदेश सभाका सदस्यको लेबीको ३० प्रतिशत जिल्ला र १५ प्रतिशत सम्बन्धित निर्वाचन क्षेत्रमा जानुपर्ने अडान राखे ।

एमालेका केन्द्रीय सदस्य चूडामणि जंगलीले अनौपचारिक क्षेत्रका सबै श्रमिकलाई सामाजिक सुरक्षा कोषमा समेट्नुपर्ने बताए । योगदानमा आधारित सामाजिक सुरक्षा योजना कार्यान्वयन भएको खण्डमा नयाँ युगको सुरुवात हुने दाबी गर्दै उनले योजनाको कार्यान्वयनलाई ऐच्छिक नभएर बाध्यकारी बनाउन माग गरे ।

एमालेका अर्का केन्द्रीय सदस्य राजीव पहारीले पार्टीका नेता तथा कार्यकर्तामा हार्दिकता नभएको र प्रतिरोधी क्षमता कमजोर भएको आरोप लगाए । कार्यक्रममा एमाले कास्कीका सचिव दर्शन लामा, उपसचिव लालबहादुर परियार, जिल्ला कमिटी कास्की सदस्यहरु नन्दलाल अधिकारी, सन्तोष पोखरेल, पोखरा महानगरपालिका कमिटी अध्यक्ष जीवनप्रसाद आचार्य लगायतले पार्टीको गतिविधिबारे बोलेका थिए ।